DILI, 02 jullu 2024 (TATOLI)—Komisaun Funsaun Públika (KFP) rejista funsionáriu públiku idade reforma ne’ebé ho idade 60-resin hamutuk 4.752.
Notísia Relevante: KFP prepara aprezenta alternativa balun ba idade reforma funsionáriu públiku
“Liga idade nian, totál funsionáriu públiku ne’ebé ita rejista ne’e funsionáriu ne’ebé liu ona idade 60 até 89,” Prezidente Komisaun Funsaun Públika (KFP), Agostinho Letêncio de Deus, hateten bainhira aprezenta relatóriu serbisu anuál KFP 2023 iha reuniaun plenária Parlamentu, tersa ne’e.
Situasaun forsa traballu iha kontestu funsaun públika ba tinan 2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, ne’ebé kompostu husi feto 14.115 no mane 25.265 no husi númeru ne’e funsionáriu permanente 33.004, ajente administrasaun públika 6376.
Deputadu CNRT, Gabriel Soares, husu KFP atu aselera ona kona-ba lei ba reforma obrigatóriu tanba ko’alia kona-ba forsa traballu bainhira haree funsionáriu sira-nia idade mós avansadu haree ba dadus ne’ebé iha mak atinje idade 60 ba leten.
“Entaun, haree katak sira-nia estamina no haree atividade tún liuliu iha serbisu sira karreira profisionál hanesan iha edukasaun no saúde ne’e ita presiza oinsá aselera lei reforma hodi bele fó bibán fali ba ita-nia oan sira-ne’ebé mak akaba iha universidade, sira bele prienxe fali fatin sira ne’ebé ita temi,” nia dehan.
Atu nune’e, nia dehan, forsa traballu iha nasionál tún to’o munisípiu, aldeia no suku sira-ne’e tenke funsiona no la’o normál.
Notísia Relevante: KFP finaliza diagnóstika forsa traballu ba Funsionáriu Públiku
Jornalista : Nelson de Sousa
Editór : Cancio Ximenes
