DILI, 02 jullu 2024 (TATOLI)–Konstrusaun altar no prasa vatikanu ne’ebé konstrui husi empreza Karya Timor ho medida diametru 50, altar ho metru 17×35 iha Tasi-Tolu ne’ebé gasta orsamentu millaun $1 atinje ona 76% no konstrusaun toilet ba bainaka Verry Important Person (VIP) atinje ona 70%.
Notísia Relevante: Empreza Karya Timor sei finaliza konstrusaun altar misa Amu Papa durante fulan-haat
“Konstrusaun fízika ba altar ne’e atinje 76%, hela mak pavimentu no uma kakuluk ba iha altar ne’e rasik. Servisu todan ne’e mak ida ita hamrik ba ne’e mak todan liuliu mak estrutura ne’e. Agora hela mak pavimentu,” Supervizor empreza Karya Timor, Januário da Costa Pinto, hateten ba jornalista iha Tasi-Tolu, tersa ne’e.
Daudaun ne’e, nia dehan, tékniku sira halo hela instalasaun fiu hodi dada eletrisidade ba altar no toilet VIP sira-ne’e kompletu hotu ona no agora hein de’it atu dada-mai.
Aleinde konstrui altar, empreza mós halo konstrusaun ba uma haat (4) ne’ebé kompleta ho toilet ba bainaka Very Important Person (VIP) sira hodi kompleta konstrusaun altar ne’e atinje ona 70%.
Konstrusaun fízika ba uma haat ne’e hodi prepara ba misa solene ne’ebé Papa Francisco sei prezide iha 10 setembru 2024 iha Tasi-Tolu, no tuir planu sarani iha territóriu hamutuk 500.000 mak sei partisipa iha misa solene ne’e.
Nune’e mós, atu kompleta no fasilita bainaka Verry Important Person (VIP) iha loron istóriku ne’e, empreza sei halo instalasaun bee-moos hodi utiliza de’it tanke hodi fornese bee ba iha toilet sira-ne’e.
“Hela de’it mak monta vidru, pinta no taka keramik (azulezu),” nia dehan.
Konstrusaun uma haat (4) ne’e kompleta ho toilet ba VIP hodi kompleta konstrusaun altar ne’e.
Aleinde ne’e, empreza Karya Timor mós sei harii toilet públiku iha Tasi-Tolu hodi bele responde ba iha nesesidade sarani sira-ne’ebé sei partisipa misa seolene ne’e.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
