iklan

EKONOMIA, INTERNASIONÁL, DILI, HEADLINE

TL presiza dezenvolve área infraestrutura teknolojia no rekursu umanu, molok adere ba ASEAN

TL presiza dezenvolve área infraestrutura teknolojia no rekursu umanu, molok adere ba ASEAN

Vise-MNEK asuntu ASEAN, Milena Rangel hamutuk ho Embaxadór Malázia, Indonézia no Brunei foto hamutuk futuru lideransa ba ASEAN hafoin partisipa iha programa aprezentasaun relatóriu viajen ba Estadu membru ASEAN husi partisipante sira iha programa Futuru Líder ba ASEAN. Programa ne’e realiza tanba Timor-Leste nia Líder Foinsa’e sira konklui ona viajen loron 10 ba nasaun sira iha ASEAN, Dili, 02 jullu 2024.Imajen Tatoli/Antonio Daciparu

DILI, 02 jullu 2024 (TATOLI)– Delegasaun Foinsa’e Timoroan hamutuk 100 ne’ebé selesionadu hanesan Líder Futuru ba Asosiasaun Nasaun Sudeste Aziátiku (ASEAN) kompleta ona sira nia vizita traballu ba nasaun hamutuk ualu, no sira nota katak Timor-Leste presiza dezenvolve maka’as nia área  infraestrutura teknolojia no rekursu umanu, molok sai membru permanente organizasaun internasionál referidu iha 2025.

Joven timoroan sira halo bá vizita nasaun-ualu hanesan Tailándia, Filipina, Singapura, Indonézia, Malázia, Vietname no Brunei Darusalam, ho atividade hanesan, enkontru hamutuk Embaixadór Timor-Leste iha nasaun hirak ne’e hodi halo mós observasaun ba prosesu hotu iha nasaun idaidak bainhira Timor-Leste adere ona ba membru ASEAN saida mak presiza Timor-Leste halo.

Notisia relevante: Timor-Leste lansa programa futuru foin-sa’e ba ASEAN

joven no estudante sira bainhira partisipante sira iha programa Futuru Lider ba ASEAN hafoin konklui ona viajen loron 10 ba nasaun sira iha ASEAN.dili 2 juilu 2024.Imajen Tatoli/Antonio Daciparu

“Durante, Ami nia vizita bá nasaun membru ASEAN haree buat barak ne’ebé Timor-Leste tenke aselera hanesan dezenvolvimentu teknolojia, dezenvolvimentu infrastrutura tanba nasaun membru ASEAN sira ne’ebé ami vizita diferente tebes ho Timor-Leste-nia,” dehan Reprezentante futuru líder ASEAN, Maria Abrantes, hafoin relata relatóriu ba Vise Ministra Asuntu ASEAN, Milena Rangel, iha MNEK, tersa ne’e

Iha vizita ne’e, nia dehan aprende mós asuntu importante tebes ba dezenvolvimentu Timor-Leste nian iha setór ekonómia nian, dezenvolvimentu rekursu umanu, turizmu no setór seluk tan ne’ebé presiza atu aprende atu aplika iha kontestu Timor-Leste nian bainhira adere ona ba membru ASEAN.

“Dezenvolvimentu kapasidade rekursu umanu ne’ebé ho kualidade importante tebes ba Timor-Leste nia preparasaun atu adere ba ASEAN. Ekipa ne’e mós mós sei prepara relatóriu hotu husi rezultadu vizita ne’e hodi aprezenta ba Governu hodi tau mós hanesan konsiderasaun bainhira Timor-Leste hola parte hanesan membru ASEAN,” nia fó hanoin.

Komponente krítiku ida husi programa ne’e inklui líder futuru sira halo vizita ba Estadu membru sira iha ASEAN hodi haforsa relasaun no amostra Timor-Leste nia potensiál sira.

Atividade ne’e, aleinde fortifika relasaun diplomátiku ne’ebé Timor-Leste iha ona ho estadu membru sira iha ASEAN, maibé hatudu mós Timor-Leste nia prontidaun hodi kontribui ba iha komunidade rejionál.

Notisia relevante: Membru ASEAN husu Timor-Leste kumpre roteiru aprovadu

Durante vizita ba nasaun sira iha ASEAN, delegasaun sira ne’e hetan previléjiu hodi hasoru malu ho ofisiál nível altu sira iha governu. Hala’o mós halo interasaun ho reprezentante sira husi setór privadu, sosiedade sivíl, no akademia.

Atividade ne’e, ajuda mós foinsa’e sira hodi koñese di’ak liután kona-ba Estadu membru sira nia prioridade no investimentu sira iha área ekonomia no sira seluk.

“Esperiénsia ne’e sai hanesan oportunidade aprendezajen ne’ebé di’ak ba delegasaun sira no kontribui mós ba iha Timor-Leste nia preparasaun ba adezaun ASEAN. Liuhusi fortalesimentu relasaun internasionál no aprende prátika di’ak sira husi rejiaun mak Timor-Leste pozisiona nia aan ho di’ak atu sai membru ASEAN ne’ebé ativu no valiozu”, nia garante.

Governu parabeniza delegasaun

Biban ne’e, Vise Ministra Asuntu ASEAN, Milena Rangel, lori Governu nia naran parabeniza delegasaun Futuru Lider ASEAN tanba aprezenta ona relatóriu vizita no nota mós asuntu importante sira ne’ebé sai mós nota prinsipál ba roteiru ne’ebé ASEAN fó ba Timor-Leste.

Ministériu Negósius Estranjeirus no Kooperasaun liuhosi Diresaun Nasionál Komunikasaun Sosiál, hamutuk ho Vise Ministra ba Asuntu ASEAN halao programa aprezentasaun relatóriu viajen ba estadu membru ASEAN hosi partisipante sira iha programa Futuru Lider ba ASEAN. Programa ne’e realiza tamba Timor-Leste nia Lider Foinsa’e sira konklui ona viajen loron 10 ba nasaun sira iha ASEAN.dili 2 juilu 2024.Imajen Tatoli/Antonio Daciparu

“Ha’u fó parabéns ba sira tanba halo ona aprezentasaun ida ne’ebé di’ak tebes husi futuru líder hirak ne’e, antes sira sai husi Timor-Leste ba mós selesionadu mak ba ne’e. Antes sira ba ne’e mós sira iha preparasaun ne’ebé másimu tebes. Programa ida ne’e parte ida mós ba kritéria ida husi roteiru ne’ebé ASEAN fó mai ita, ne’ebé ita sei kontinua nafatin programa ne’e ba oin,” Kompromete Vise Ministra ne’e.

Iha fulan-Abríl, Governu lansa programa ho naran Futuru Lider ba ASEAN, ho intensaun atu prepara rekursu umanu ne’ebé haree liu ba joven sira.

“Ita nia joven hamutuk 100 mak selesionadu, entaun ita haruka sira ba iha nasaun hamutuk membru ASEAN ualu ne’ebé la inklui Myanmar no Laos, sira ba hala’o enkontru no atividade oioin kona-ba ASEAN no sira agora mai aprezenta progresu sira ba Governu,” katak.

Durante iha nasaun ualu ne’e, lider joven hirak ne’e halo mós peskiza kona-ba dezenvolvimentu sustentvél, haree mós ba kresimentu ekonómiku no seluk tan.

“Inisiativa ne’e nia objetivu mak atu estimula foinsa’e sira nia kapasidade hodi bele kolabora ho instituisaun sira iha ASEAN no kontribui ba prosesu adezaun,” Milena hateten.

Notisia relevante: PR Horta-PM Xanana diskute preparasaun TL nia adezaun ba ASEAN

 Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!