DILI, 03 jullu 2024 (TATOLI) – Embaixada Repúblika Indonézia (KBRI) koordena ona ho Governu no Igreja Katólika iha Timor-Leste kona-ba opsaun rezidénsia temporária ba sarani NTT Indonézia (Nusa Tenggara Timur) ne’ebé hakarak tuir misa iha vizita Papa Francisco iha Tasi-Tolu.
Embaixadór Indonézia iha Timor-Leste, Okto Dorinus Manik, hateten Repúblika Indonézia (RI), tinan ne’e, hetan vizita direta husi Papa Francisco, maibé fiar-na’in NTT balun la konsege haree rasik Papa Francisco tanba distánsia dook liu entre Jakarta no NTT.
“Ami ko’alia ho Governu Timor-Leste no mós ho dioseze, iha ne’e atu buka opsaun di’ak liu ba akomodasaun, karik ho tenda, se la tama iha ema nia uma, iha igreja, opsaun seluk fó fatin ruma atu maluk sira NTT bele hela provizóriu”, Embaixadór Okto informa ba jornalista sira iha KBRI Farol, ohin.
Nia dehan, Timor-Leste, antes ne’e, deside ona atu koloka fiar-na’in NTT ba edifísiu ida ne’ebé uluk uza ba kuarentena iha área Tasi-Tolu no fatin konstrusaun Pelican Paradise Resort iha Tibar, Liquiça.
“Embaixada Indonézia mós sei koordena ho parókia sira iha NTT atu sira bele arranja ba ema sira ne’ebé la presiza mai Timor-Leste, atu nune’e bele prevene buat ne’ebé la dezeja akontese no hein katak vizita ne’e sei seguru, hakmatek no sai bensaun ba hothotu”, nia relata.
Kona-ba apoiu Embaixadór Okto rekoñese katak, Embaixada Indonézia prepara hela atu lori pesoál saúde sira husi Indonézia hodi loke postu saúde temporáriu balun iha pontu oioin durante vizita Papa Francisco nian.
“Ami sei tenta atu fasilita, lori mai médiku balun, karik ami bele kria pontu balun hanesan postu ba saúde, ami bele fornese bebida no merenda, ami buka hela opsaun no mantein kontatu ho komisaun atu buat hotu bele organiza no kolaborasaun ne’e bele sai sinérjiku ho di’ak”, nia dehan.
Antes ne’e, Arsebispu Metropolitanu Dili, Virgílio Kardeál do Carmo da Silva, fó sai katak misa iha Tasi-Tolu sei hahú iha tuku 16:00 iha loron 10 fulan-Setembru ho estimativa kongregasaun hamutuk ema 700.000 la’ós de’it husi Timor-Leste maibé mós husi NTT, Indonézia no Austrália.
Jornalista : Felicidade Ximenes
Editór : Zezito Silva
