Komisaun F bolu MS klarifika prosesu rekrutamentu ba profisionál saúde

DILI, 03 jullu 2024 (TATOLI)—Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál (PN), kuarta ne’e, hala’o audiénsia ho Vise Ministériu Saúde (MS) kona-ba petisaun númeru 7/VI(1a) reklamasaun kona-ba rekrutamentu profísionál saúde.

Notísia Relevante: Profisionál Saúde 2.256 kontratu konklui no MS foin rekruta no sei simu 229 

“Ohin, komisaun halo audiénsia ho Vise Ministru Saúde ho objetivu haree petisaun ne’ebé haruka mai iha Prezidente Parlamentu Nasionál, kona-ba prosesu rekrutamentu ba profisionál saúde sira-ne’ebé mak akontese iha fulan hirak liuba, liuliu ba aplikante ne’ebé mak balun iha konteúdu petisaun ne’e. Haree liu ba aplikante sira-ne’ebé mak balun naran la sai no la admitidu, no mós dehan iha prosesu rekrutamentu ne’e aloka fali ema-ne’ebé mak la’ós ema profisionál saúde maibé aloka fali ema seluk ho mosu familiarizmu ne’ebé mak iha,” Prezidente komisaun F, Maria Gorumali Barreto, hateten ba jornalista sira hafoin ramata audiénsia iha PN.

Ho konteúdu petisaun ne’e mak komisaun bolu Ministra Saúde maibé Vise-Ministru ba Fortalesimentu Instituisionál Saúde, José dos Reis Magno, mak marka prezensa tanba ohin atende serbisu seluk hodi partisipa iha reuniaun Konsellu Ministru.

Nune’e, parte MS mai ho komisaun organizadora ba rekrutamentu profisionál saúde hodi informa prosesu rekrutamentu sira iha kriteira hitu ne’ebé mak fó sai iha avizu hodi sé mak iha interrese atu aplika konkore iha vaga profisionál saúde, parte rekursu umanu  presiza atu halo rekrutamentu tenke prienxe rekezitu ne’ebé iha.

Rekezitu ne’ebé importante liu iha prosesu rekrutamentu haree liu ba diploma kada aplikante, katak relevante ho asuntu setór saúde ne’ebé iha ka lae, se sira-ne’ebé la mai ho diploma saúde ninia entaun klaru nia sei la liu.

“MS informa mós iha prosesu loke rekrutamentu aplikamente hamutuk 7838 no ba sira-ne’ebé pasa 1701 no tuir mai prosesu intervista iha mós pergunta liga área saúde nian. Tan ne’e, laiha pergunta sees husi área saúde nian, ne’ebé  tuir ida-idak nian hanesan ba médiku, enfermeiru no parteira,” nia dehan.

Deputada Gorumali hateten, komisaun organizadora hato’o mós iha aplikamente, ezemplu nia aplika iha munisípiu ne’ebé ou aplika ba iha HNGV entaun nia tenke prienxe iha ne’eba ninia fatin iha ne’ebé, entaun bainhira naran sai tenke iha munisípiu ne’e hodi labele sai fali lista iha fatin seluk.

“Ida-ne’e mak esplikasaun ne’ebé iha, tanba iha karta petisaun ne’ebé hato’o katak aplikante ne’e nia naran la sai iha munisípiu,maibé bainhira haree nia aplikasaun antes ne’e iha HNGV, klaru ba haree iha kuadru avizu munisípiu naran la sai iha ne’eba,’’ nia dehan.

Ba fali aplikante balun naran la sai, tanba iha karta pedidu aplikasaun la kompletu no balun ninia dokumentu ne’ebé iha, nia hakerek ho lala’is dalaruma la asina no ema-ne’ebé sai referénsia ba sira la asina sira nia kuríkulu vitae ne’ebé hatama, tan ne’e sai mós parte ida komisaun organizadora ba rekrutamentu la fó sai naran iha lista.

“Ida-ne’e mak bazeia ba esplikasaun ne’ebé husi Ministériu Saúde nian, ne’ebé rekrutamentu ne’e ba timoroan tomak ne’ebé nia espesialidade iha área saúde,” nia hateten.

Durante audiénsia iha rekomendasaun husi Deputadu sira komisaun atu ba oin MS oinsá haree liu ba imparsialidade no tau prioridade ba timoroan sira.

Vise-Ministru ba Fortalesimentu Instituisionál Saúde, José dos Reis Magno, hateten petisaun ne’e ko’alia kona-ba iha insatisfeitu ruma ba prosesu rekrutamentu komisaun permanente ne’ebé gabinete MS hala’o.

Ba kontratadu sira-ne’ebé ohin komisaun permanente ba rekrutamentu hato’o ona justifikasaun ka klarifikasaun sira hotu ba Deputadu sira iha komisaun F, nune’e ministériu nafatin hala’o rekrutamentu sira ho imparsial.

Jornalista : Nelson de Sousa

Editór        : Cancio Ximenes