DILI, 03 Jullu 2024 (TATOLI) – Prezidente Asosiasaun Emprezariál Feto Timor-Leste (AEMTL, sigla portugés), Hergui Luina Fernandes Alves, hateten atividade komersiál iha país barak, maibé laiha laboratóriu atu halo teste ba kualidade protudu hodi hetan sertifikasaun, tanba ne’e komérsiu sei hasoru difikuldade ba iha esportasaun.
“Ko’alia kona-ba atividade komersiál iha Timor-Leste hahú mudansa ona, maibé sei iha difikuldade boot ne’ebé impede mós atividade komersiál liga ba esportasaun nian, tanba bainhira ko’alia kona-ba esportasaun ko’alia mós kona-ba sertifikasaun ba produtu tama iha merkadu globál. Ida ne’e sei sai difikuldade ba feto sira labele esporta sira-nia produtu”, Hergui Luina dehan iha Maubara Room, Timor Plaza, Dili, ohin.
Nia lamenta katak ho falta laboratóriu ba teste kualidade produtu maka durante ne’e akontese kustu ba iha shipping line mós aas tebes no halo kontentór sira folin sa’e.
Prezidente ne’e salienta katak Timor-Leste iha produtu barak ne’ebé bele hola parte ba merkadu globál, maibé to’o agora seidauk kuda barak hodi responde ba merkadu globál, tanba la asesu ba merkadu, inklui difikuldade ida mak laboratóriu ba teste kualidade ne’e.
“AEMTL rasik antes ne’e tenta halo importasaun budu-tasi no seluk tan, maibé la bá merkadu destinadu, ami sempre liuhusi merkadu Indonézia atu tama iha merkadu globál, tanba ita rasik laiha sertifikasaun no ita-nia kuantidade produtu mós seidauk natoon atu hatán ba pedidu globál”, nia dehan.
Haree ba difikuldade laboratóriu ne’e maka nia husu ba Governu, liuliu Institutu Kualidade Timor-Leste (IQTL, sigla portugés) atu halo esforsu hodi estabelese laboratóriu nasionál ida hodi fasilita komérsiu sira bainhira hakarak halo esportasaun ba produtu lokál ruma tenke hetan sertifikasaun.
AEMTL rasik daudaun halo ona nia espansaun ba munisípiu 12, inklui Rejiaun Administrativa Espesiál Oé-Cusse Ambeno (RAEOA) no daudaun serbisu iha baze dadus atu hatene númeru ezatu membru AEMTL nian. Daudaun iha empreza 400 hanesan ne’e mak hamahan aan iha AEMTL.
Jornalista: Arminda Fonseca
Editora: Maria Auxiliadora
