DILI, 03 jullu 2024 (TATOLI)– Governu liuhusi Ajénsia Dezenvolvimentu Nasionál, Institutu Públiku (ADN, I.P) fó fiar ba empreza Karya Timor konstrui altar foun no fó fiar ba Empreza Hoven II hodi reabilita altar antiga iha Tasi-Tolu ne’ebé Papa João Paulo II uza hodi selebra misa iha 1989.
Notísia Relevante: Konstrusaun altar no toilet ba VIP iha Tasi-Tolu atinje ona 76%-70%
Enjiñeiru Empreza Hoven II Unipesoál, Lda, Januário da Silva, hateten atu halo preparasaun ba simu Papa Francisco hala’o vizita Estadu no pastorál iha Timor-Leste, kompañia halo hela reabilitasaun ba altar antiga no uma adat iha Tasi-Tolu ne’e atinje ona 60%.
“Uma adat ne’e ninia kakuluk mak prontu ona no restu seidauk tanba prosesu reabilitasaun la’o hela,” Enjiñeiru Januário da Silva hateten ba Agência Tatoli, liuhosi telefónika, kuarta ne’e.
To’o agora, nia dehan, empreza seidauk konklui obra reabilitasaun ne’e tanba uma adat nia kakuluk uza produtu lokál hanesan Tali-Metan orijinál mak susar atu hetan maibé uma kakuluk ne’e pronto ona.
“Ida-ne’e mak araska duni ba ami. Maibé ami konsege termina ona. Ami konklui ba uma kakuluk nian ne’e no agora hela de’it mak ida foru no pinta ne’e mak sei la’o daudaun hela,” nia hateten.
Nune’e mós, empreza mós hadi’a hela tenda iha uma adat sira sorin, tanba karreta balun ba xoke no feruzen hodi hadi’a no sei troka azulezu sira-ne’ebé estraga ona.
Nia dehan, uma adat Tasi-Tolu hanesan emblema nasionál ka fatin istoriku ho ninia valór istóriku ne’e nafatin, valór orijinál ne’ebé harii iha1989 ne’e tuir istoria ne’ebé ema hatene, la halo mudansa maibé hadi’a de’it buat ne’ebé aat no la halo buat foun ida iha ne’e.
Reabilitasaun ne’e empreza simu orientasaun hosi na’in ba obra mak Ajensia Dezenvolvimentu Nasioál (ADN) iha fulan inisiu fevereiru no hahú halo reabilitasaun ne’e fevereiru nia klaran iha 21 fevereiru 2024.
“Reabilitasaun uma adat Tasi-Tolu sei konklui iha fulan jullu nia rohan. Reabilitasaun uma adat Tasi-Tolu ne’e mós hola parte hotu iha preparasaun vizita sua santidade Papa Francisco nian,” nia dehan.
Tuir planu, Papa Francisco sei hala’o vizita Estadu no pastorál iha Timor-Leste hahú husi 09-11 setembru 2024, no iha 10 setembru (tuku 16h00) ne’e Papa sei prezide misa solene iha Tasi-Tolu.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
