Reabilitasaun rezidénsia madre ALMA atinje ona 98%

DILI, 03 jullu 2024 (TATOLI)–Enjiñeiru Empreza Hoven II Unipesoál, Lda, Januário da Silva, hateten obra reabilitasaun rezidénsia kongregasaun Madre Asosiasi Lembaga Misionaris Awam (ALMA) iha Praia Coqueiros ka Pantai Kelapa atinje ona 98%.

Notísia Relevante: Konstrusaun altar no toilet ba VIP iha Tasi-Tolu atinje ona 76%-70%

Responsável ne’e hateten, Ajensia Dezenvolvimentu Nasionál (AND) fó rezidénsia ne’e ba empreza hodi halo reabilitasaun ba madre ALMA sira-nian ne’e hanesan preparasaun ida husi Estadu no igreja Timor-Leste atu Papa Francisco nia vizita pastorál ne’e bele vizita fatin ne’e.

“Rezidensia Madre ALMA inklui aula ida iha kotuk atinje ona 98%. Jardin ho pavimentu mak foin atinje 50%, moru no portaun atinje ona 100%,” Januário da Silva, hateten ba Agência Tatoli liuhosi telefónika, tersa (02 jullu 2024) ne’e.

Nia hateten, obra ba reabilitasaun ba jardin ne’e foin atinje porseuntu kiik tanba foin hahú halo konstrusaun iha semana kotuk.

Tuir nia, porsentu kiik-oan ba reabilitasaun ba rezidénsia madre ALMA sira-nian ne’e mak atu monta iluminasaun lakan iha uma laran de’it, tanba restante obra ne’e konklui ona.

Responsável ne’e esplika, empreza pinta moru no parede uma nian, hasai ai no besi feruzen no taka kuak parede nian, empreza mós hadi’a odamatan no prepara rampa ba ema ho defisiénsia (EhD) hodi la’o.

“Bu’at foun ne’ebé mak empreza halo mak rampa ba ema ho defisiensia la’o no halo mós moru foun, sira atinje ona 100%¸” nia dehan.

Obra reabilitasaun ne’e hahú kedas iha fulan-fevereiru no sei termina iha fulan-jullu nia rohan tuir kontratu entre Governu ho empreza establese.

“Ami la promete, maibé molok fulan ida-ne’e ramata, ami sei termina,” nia hateten.

Tuir planu, Papa Francisco sei hala’o vizita pastorál iha Timor-Leste hahú husi 09-11 setembru 2024 no iha loron 10 setembru dadeersan ne’e sei hala’o vizita iha kongregasaun ALMA hodi vizita labarik orfonatu sira iha fatin ne’e.

Notísia Relevante: Reabilitasaun CCD atinje 75%

Jornalista : Jesuína Xavier

Editór       : Cancio Ximenes