DILI, 04 Jullu 2024 (TATOLI) – Centro Nacional Chega! Institutu Públiku (CNC, I.P) realiza semináriu ho tema “Papél Muzeu, Arkivu iha Prezervasaun Memória no Introdusaun Istória” hodi konvida oradór internasionál sira hodi fahe sira-nia esperénsia.
Prezidente Konsellu Administrasaun CNC, I.P, Manuel Mesquita Pereira, hateten semináriu ne’e importante, tanba rona esperénsia sira husi péritu internasionál kona-ba prezervasaun no oinsá mellora kompriensaun kona-ba papél muzeu, arkivu iha prezervasaun no tranzmisaun istória no memória koletiva, tanba CNC rasik iha nia kompromisu ida prezerva povu Timor-Leste nia istória no memória.
“Ohin ita hamutuk iha fatin ne’e atu fahe hanoin no matenek ba malu kona-ba oinsá muzeu no arkivu sira sai instrumentu importante, hodi prezerva povu nia memória ho di’ak no oinsá bele halo papél importante ida iha futuru”, Manuel Mesquita dehan iha salaun CNC, I.P, Balide, Dili, ohin.
Nia hatutan atividade ne’e pertinente atu rona no simu esperiénsia foun sira husi oradór sira, tanba CNC rasik mós daudaun halo hela konstrusaun ba edifísiu foun CNC nian ne’ebé sei utiliza iha tinan oin.
Iha fatin hanesan, Vise-Ministru ba Asuntu Parlamentár, Adrito Hugo da Costa, realsa semináriu ne’e importante hodi kontinua kompromisu Estadu Timor-Leste nian dezde restaurasaun indepedénsia, pós-referendu iha 30 Agostu 1999, tanba prezervasaun memória ne’e pertinente ba iha nasaun ida.
“Obra ida importante iha inísiu indepedénsia nian mak polítika rekonsiliasaun. Obra ida inisiativa mai kedas antes Timor-Leste restaura nia indepedénsia iha 20 Maiu 2002 ne’ebé halo ona projesaun ba futuru Estadu nian. Prozesaun ba futuru ne’e mak relasaun Timor-Leste entre nasaun viziña Indonézia, oinsá atu jere ba prosperiedade Timor-Leste nian ne’ebé nabilan. Ita presiza tebes rona peritu sira-nia hanoin oinsá jere sira-nia arkivu no prezerva memória nasaun nian ho di’ak”, nia dehan.
Oradór internasionál na’in-tolu iha semináriu ne’e mak Prof. David Webster, Dr. Nisay Hang no Prof. Dr. Ying Hoy.
Entre sira na’in tolu ne’e lori tópiku ne’ebé la hanesan mak kona-ba papél muzeu no arkivu ba prezervasaun no tranzmisaun istória no memória koletiva, papél muzeu no arkivu ne’ebé dealing ho memória difísil no prevensaun violénsia masál no papél muzeu no arkivu ba edukasaun, pás no promosaun direitu umanu.
Jornalista: Arminda Fonseca
Editora: Maria Auxiliadora
