DILI, 04 Jullu 2024 (TATOLI) – Ministériu Komérsiu no Indústria (MKI) planeia ona atu reativa merkadu fronteira terrestre sira entre Timor-Leste no Indonézia.
Ministru Komérsiu no Indústria, Filipus Nino Pereira, hateten katak sira-nia parte halo ona vizita bá merkadu fronteira iha Salele, Mota-Masin (Covalima), Oé-Cusse no Mota-Ain (Bobonaro) hodi haree kondisaun atu reativa merkadu fronteira terrestre.
“Esforsu ne’e husi Governu Dalimak no Daneen nian. Ami halo ona vizita bá fatin sira ne’e, maibé daudaun fatin sira ne’e Ministériu Saúde mak uza hela. Ami halo ona komunikasaun atu fatin sira ne’e foti fali hodi reativa merkadu fronteira terrestre, tanba fó impaktu pozitivu ba ekonomia iha área fronteira sira”, Filipus Nino Pereira dehan hafoin semináriu kona-ba Oportunidade no Dezafiu Governasaun iha IntegrasaunGlobál-Rejionál, iha Timor Plaza, ohin.
Tuir komunikadu ne’ebé Tatoli asesu iha Maiu 2023, reprezentante bupati Belu, Taolin Agustinus, realsa sira-nia parte simu ho ksolok kona-ba reativasaun merkadu fronteira terrestre Mota-Ain.
Lembra katak merkadu fronteira ne’e rasik la funsiona tanba situasaun pandémia covid-19.
Aleinde ne’e, reativasaun Merkadu Mota-Ain ne’e mós atu fó ben-bindu ba zona komérsiu livre iha área fronteira Indonézia no Timor-Leste ne’ebé konkorda ona husi nasaun rua ne’e.
Bainhira reativa duni merkadu fronteira terrestre ka zona komérsiu livre ne’e mak sei ajuda duni no fasilita relasaun komérsiu entre nasaun rua ne’e kona-ba esportasaun no importasaun ba nesesidade oioin país rua nian.
“Espera katak Zona Komérsiu Livre ne’e sei ativa iha tempu badak no ita bele hetan benefísiu husi atividade ne’e liuhusi envolvimentu setór emprezariál sira, tantu husi Indonézia no Timor-Leste,” nia dehan.
Tuir nia, atividade ekonómika área fronteira sira tenke hamoris hikas no labele dada naruk tempu tanba ida-ne’e nia benefísiu mak atu estimula kreximentu ekonómiku ba povu nasaun rua nian.
Notísia relevante: Governu halo hela diskusaun ba merkadu fronteira
Jornalista: Arminda Fonseca
Editora: Maria Auxiliadora
