DILI, 05 jullu 2024 (TATOLI)—Prezidente Parlamentu Nasionál (PPN), Maria Fernanda Lay, sesta ne’e, ofisiálmente fó pose ba Komisáriu Komisaun Anti-Korrupsaun (CAC, siglá portugés), Rui Pereira dos Santos, ba mandatu tinan haat (4).
Nia hateten, tomada pose ne’e hatudu katak Estadu tomak iha kompromisu atu kombate korrupsaun iha Timor-Leste.
Notísia Relevante: PN eleze Rui Pereira sai komisáriu CAC ho votu afavór-41
“Ohin, Komisáriu CAC simu tomada pose, hatudu realmente fiar Governu ninian ne’ebé hato’o, ami delibera tiha ona no pasa ho maiória absoluta. Hodi nune’e, aktu ida ohin, atu formaliza ofisialmente tomada pose ho prezensa Primeriu-Ministru atu hatudu ba públiku katak Governu, Parlamentu no Estadu tomak iha nesesidade atu hatuur duni komisáriu CAC, hodi bele hala’o atividade,” Prezidente Parlamentu Nasionál ne’e hato’o iha nia intervensaun iha sala konferénsia Parlamentu.
Hafoin serimónia no asinatura termu pose, Komisáriu CAC, Rui Pereira dos Santos, lee kompromisu jura ba nia onra kumpre ho lealdade funsaun ne’ebé simu sei hala’o ho konformidade tuir lei ne’ebé iha ho matenek no aptidaun ba ezersísiu kargu.
Agradese ba konfiansa no sei serbi ho imparsialidade
Rui Pereira dos Santos hateten, nu’udar komisáriu CAC ne’ebé hetan fiar husi Governu tanba de’it nia-parte iha esperiénsia serbisu naruk iha setór justisa hanesan sai advogadu iha tempu Indonézia dezde tinan 1996 no hafoin iha tinan 2000- 2005 nu’udar juíz iha tribunál Dili, depois hola parte iha komisaun verdade amizade, tuir mai mós fó asesória tinan barak no iha tiinan 2010-2014 nu’udar adjuntu provedór iha PDHJ no asume mós adjuntu komisáriu CAC, nune’e CAC la’ós foin dahuluk nia-parte ba serbisu iha ne’eba.
“Sei tau konfiansa ne’ebé Parlamentu ho Governu fó mai atan ha’u ne’e, ita hala’o tuir serbisu no tuir kompeténsia ne’ebé CAC iha, ne’ebé sei tau atensaun ba imparsialidade, independénsia CAC nu’udar instituisaun ne’ebé mak atu kombate korrupsaun,” nia kompromete.
Nia promote, nu’udar komisáriu CAC serbisu ba oin sei la halo persegisaun polítika, ema-ne’ebé halo korrupsaun faktu no prova mak lori ba oin.
Nune’e, nu’udar komisáriu sei ba serbisu hamutuk ho kargu xefia no funsionáriu CAC tomak serbisu ho ekipa laiha kór partidu iha ne’eba no partidu ne’e to’o tempu eleisaun mak foin ezerse, maibé tenke tau atensaun ba imparsialidade, independénsia CAC nu’udar instituisaun ne’ebé mak atu kombate korrupsaun.
Mezmu nune’e, nu’udar komisáriu foin simu pose labele ko’alia barak no tenke halo uluk serbisu mak sei bele ko’alia, hanesan CAC nia kna’ar importante ba prevensaun no kombate korrupsaun maibé hanesan tinan ida resin, CAC liuliu nia funsionamentu ladún efetivu tanba komisáriu laiha.
Tanba ne’e, prioridade ba serbisu iha fulan ida ka rua ba dahuluk sei haree sistema administrasaun ne’ebé durante tinan ida resin la la´o tanba laiha komisáriu CAC.
Sei tau prioridade mós, atu halo investigasaun ba asuntu korrupsaun, tanba ne’e kazu sira-ne’ebé pendente no kazu sira-ne’ebé hetan atensaun husi públiku, komisáriu sei tau konsiderasaun no prioridade atu finaliza nia investigasaun.
Serbisu barak mak nia parte tenke halo, liuliu CAC nia mós hola parte CAC organizasaun mundiál no atu tama ASEAN, CAC tenke reforsa tanba iha futuru bainhira iha kazu boot ruma liga nasaun membru ASEAN seluk, Timor-Leste mós preparadu halo serbisu.
Nia hateten, sei serbisu hamutuk ho Ministériu Públiku, Tribunál no Ministériu Justisa, oinsá atu hala’o serbisu ba oin hanesan formasaun ba investigadór sira no sei serbisu hamutuk ho mídia sira.
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes
