DILI, 06 jullu 2024 (TATOLI)–Xefe Departamentu Saneamentu iha Autoridade Munisípiu Dili (AMD), Domingos dos Santos Soriano, hateten empreza China Harbour konstrui ona fatin hatuur kaixote lixu hamutuk 600-resin atu komunidade fakar lixu iha laran.
Notísia Relevante: AMD kontrata empreza China Harbour koloka kaixote lixu 7.000 iha Dili
Nia esplika, konstrusaun fatin atu tau kaixote lixu ne’e atu fasilita ekipa saneamentu atu raut ka foti lixu sira-ne’ebé populasaun so’e iha lixeiru ka kaixote nia laran.
“Ita ko’alia preparasaun fatin lixu ka sleep ne’e atu tau kaixote lixu hodi komunidade ba soe lixu iha iha laran. Konstrusaun ne’e atinje liu ona 600 no ninia konstrusaun kontinua la’o,” Xefe Departamentu Saneamentu iha Autoridade Munisípiu Dili, Domingos dos Santos Soriano, hateten ba Agência Tatoli, iha Caicoli.
Konstrusaun no preparasaun fatin foun ba foti lixu ne’e modern uitoan tanba raut lixu ne’e automatikamente hodi fakar ba iha kamioneta sira foti lixu ne’e.
Tuir nia, planu ba raut lixu iha kapitál no kamioneta moderna agora ne’e relevante hanesan iha nasaun dezenvolvidu sira iha Austrália no Portugál.
Governu prepara fatin no kaixote lixu, no sei fahe mós kaixote lixu kiik sira ba iha populasaun ne’ebé la asesu ba iha kamioneta lixeiru nian.
“Fatin sira-ne’ebé kamioneta tama kloot ne’e, karreta tiga roda mak sei ba foti hodi bele fakar iha lixeiru boot. Ida-ne’e modelu ketak ida,” nia dehan.
Nia garante katak iha tempu badak empreza sei termina konstrusaun fatin lixeiru iha kapitál, Dili tanba fatin lixu sira-ne’ebé atu harii hamutuk 1.000.
“Se konstrusan ne’e la to’o, restante ne’e ita sei fahe kaixote kiik-oan ba iha populasaun sira,” nia dehan.
Notísia Relevante: AMD sei koloka kaixote lixu 2,165 iha kapitál Dili
Jornalista : Jesuína Xavier
Editór : Cancio Ximenes
