DILI, 08 jullu 2024 (TATOLI)—Diretór-Ezekutivu Luta Hamutuk, José Alves da Costa, hateten se Ministra Edukasaun la rezolve problema profesor kontratadu iha 2023 no reklamante sira-ne’ebé iha, ne’e fó impaktu ba ensinu aprendizajen iha eskola sira.
Notísia Relevante: PN aprova rezolusaun-rekomenda Governu solusiona problema antigu profesór kontratadu
“Ha’u hanoin Parlamentu Nasionál hasai ona rezolusaun, loloos ne’e iha loron 30 ka 60 ne’e, iha ona naroman katak atu implementa. Ita haree, Ministra Edukasaun (Dulce de Jesus) arogante demais, entaun nia ladún fó atensaun,” Diretór Ezekutivu Luta Hamutuk, José Alves da Costa, ba Agência Tatoli, iha Faról.
Nia konsidera, Governu ladún tau atensaun sériu no dalaruma mos kontra rezolusaun husi Parlamentu Nasionál, entaun ninia implikasaun ba profesór kontratadu sira-ninia vida no ba estudante sira-nia loron aban.
Se profesór sira-nia vida ameasadu, ninia implikasaun mós ba iha setór edukasaun tanba profesór sira balun lori matéria barak iha loron ida tomak.
“Até a data profesor sira-ne’ebé hanorin iha eskola sira balun laiha. Ezemplu, hanorin matéria Tetun, Matemátika, Istória no seluktan. Obriga profesór sira hanorin matéria rua ka liu ida-ne’e no laiha tempu atu deskansa no atende aula dadeer to’o lorokraik,” nia dehan,
Tuir nia, Governu kontra hela profesór ativu sira-nia direitu, tanba dadus iha Ministériu Edukasaun ne’e kompletu kona-ba profesór sira-ne’e, lahatene atu hakarak .hafraku setór edukasaun no povu nia oan labele sai matenek ka oinsá.
Tanba ne’e, nia sujere ba Primeiru-Ministru, Kay Rala Xanana Gusmão, se bele hasai tiha membru Governu Konstitusionál da-sia (IX) sira-ne’ebé laiha kapasidade hodi hala’o nia kna’ar iha ministériu sira-ne’e.
“Primeiru-Ministru ema funu-na’in, se membru servisu ladi’ak, laiha kompeténsia no lahatuur espíritu luta-na’in sira-nian ba independensia ida-ne’e, tenke hasai,” nia hateten.
Notísia Relevante: ME hapara profesór kontratadu difikulta elaborasaun matéria ba ezame períodu dahuluk
Jornalista : Jesuína Xavier
Editór : Cancio Ximenes
