iklan

EKONOMIA, BOBONARO, HEADLINE, MUNISÍPIU

Irrigasaun la funsiona, natar ektare 550 iha Cailaco falla koleta

Irrigasaun la funsiona, natar ektare 550 iha Cailaco falla koleta

Kondisaun atuál natar iha Marco, Meligo, ne'ebé komunidade agrikultór suku Meligo, postu administrativu Cailaco, munisípiu Bobonaro abandona durante ne'e. Imajen Tatoli/Sérgio da Cruz.

BOBONARO, 08 jullu 2024 (TATOLI)-Tuir dadus ne’ebé Autoridade Postu Administrativu Cailaco, Munisípiu Bobonaro rekolla hatudu katak natar hamutuk ekatre 550 iha parte Marco no seluk tan falla kolleta hare iha époka dahuluk tinan 2024 tanba irrigasaun la funsiona.

Administradór postu administrativu Cailaco, Rodolfo da Cruz, informa problema ne’e akontese kauza hosi bailoro naruk no kondisaun fíziku infraestrutura irrigasaun kuaze aat totál.

Notísia relevante: Hare époka dahuluk 2024 iha Bobonaro kuda iha natar ekatare 3,504

“Tinan ida ne’e purvolta ekatre 550 mak falla kolleta, laiha rezultadu, ne’e primeiru tanba bee-mak laiha de’it, Cailaco lisuk ho bee ida Bulobu ne’e, maibé tanba ita-nia agrikultór sira iha postu Maliana satan ona bee ba iha Maliana, bailoro hanesan bee la mai ona. Sé udan mai oituan tesik mai iha Marco ho Mautalo nia, ne’e mós komunidade sira ba ho manuál lima de’it satan mai sira-nia natar tanba irrigasaun la di’ak hotu ona,” nia informa ba jornalista sira iha nia knaar fatin, segunda ne’e.

Nia husu Ministériu Agrikultura, Pekuária, Peska no Floresta atu tau matan ba problema ne’e atubele fornese bee-ba natar, tanba irrigasaun referida konstrui dezde tempu okupasaun Indonézia to’o agora governu seidauk tau prioridade atu halo reabilitasaun.

Nia dehan, ko’alia kona-bá imvestimentu iha setór agrikultura atu hasa’e produsaun ne’e, entaun irrigasaun tenke garante hodi fornese bee ba Natar.

“Ami hakarak ita-nia postu Cailaco ne’e tau barrajen ka bendungan ida, sei ida-ne’e mak iha ona agrikultór sira iha Cailaco ne’e bele halo natar tinan ida dala rua, dala tolu, ami-nia joven sira mós labele sai ona ba rai-li’ur, tanba sira bele dezenvolve sira-nia produtu lori ba fa’an iha merkadu,” nia katak.

Diretór Agrikultura Munisípiu Bobonaro, Longuinhos João, rekoñese natar ekatre 100-resin iha Marco no parte seluk tan mak falla kolleta, tanba bee la sufisiente.

Tuir nia, kanál irrigasaun iha Cailaco sei funsiona, maibé tanba laiha Intek nune’e labele fornese bee ba agrikultór sira-nia natar.

Nia dehan, problema boot mak ita tenke organiza atu normaliza kanu-matan ne’e, nune’e bee ne’e bele tama natar, agora foin dadauk akontese ne’e, tanba iha eskavadór apoia husi ministériu ne’e ida de’it.

“Depois mai ne’e sentraliza iha Bilimau, desloka mai Marco, konsege servisu duni, maibé iha-ne’ebá mota sobu, mákina tenke fila-fali ba Bilimau, nune’e dala rua, depois fila fali mai normaliza tiha irrigasaun to’o bee matan hatama bee tiha, to’o ikus ita-nia agrikultór la konsege halo natar,” nia hateten.

Longuinhos João mos observa katak problema seluk afeta falla koileta mak sirkulasaun animál iha natar laran maka’as tebes tanba natar sira kuaze laiha lutu.

Nia hatutan, maske époka dahuluk agrikultór sira laiha produsaun, maibé diresaun Servisu Munisipál Agrikultura Munisípiu Bobonaro sei esforsu hela atu distribui fini produtu sira seluk, hodi fasilita agrikultór sira kuda iha époka daruak nia.

Ne’e duni Diresaun Agrikultura Munisípiu rekolla ona dadus no sei tau prioridade atu rezolve fazeadamente tuir kapasidade orsamentu ne’ebé Governu Sentrál aloka mai Autoridade Munisípiu Bobonaro.

“Ita planeia hela iha 2025 hakarak halo konstrusaun irrigasaun rua tán, ne’ebé periodikamente kada tinan ida sempre tau prioridade atu halo konstrusaun no reabilitasaun,” nia akresenta.

Nia apela ba natar na’in iha postu administrativu Cailaco atu kontinua utiliza rekursu hirak-ne’ebé iha hodi halo natar, tanba Governu sei esforsu atu rezolve problema ne’ebé enfrenta.

Notísia relevante: Natar ektare 200 iha Meligo ‘abandona’ tanba irrigasaun la funsiona

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!