iklan

EKONOMIA, BOBONARO, HEADLINE, MUNISÍPIU

Natar ektare 200 iha Meligo ‘abandona’ tanba irrigasaun la funsiona

Natar ektare 200 iha Meligo ‘abandona’ tanba irrigasaun la funsiona

Kondisaun atuál irrigasaun iha postu administrativu Cailaco, munisípiu Bobonaro ne'ebé durante ne'e hetan estragus. Imajen Tatoli/Sérgio da Cruz.

BOBONARO, 25 janeiru 2024 (TATOLI) – Natar ektare 200 iha suku Meligo, postu administrativu Cailaco, munisípiu Bobonaro, durante ne’e abandona tanba irrigasaun la funsiona.

Agrikultór sira hosi suku Meligo, postu administrativu Cailaco, munisípiu Bobonaro, durante ne’e abandona natar hamutuk ektare 200 ne’ebé pertense iha Cailaco, Marco.

Administradór postu administrativu Cailaco, Alfredo Mata Dau, konfirma natar hirak-ne’e abandona kauza hosi irrigasaun durante ne’e la funsiona ho di’ak.

Kondisaun atuál natar iha Marco, Meligo, ne’ebé komunidade agrikultór suku Meligo, postu administrativu Cailaco, munisípiu Bobonaro abandona durante ne’e. Imajen Tatoli/Sérgio da Cruz.

Meta Dau argumenta, irrigasaun refere konstui dezde tempu okupasaun Indonézia, maibé daudaun ne’e nia kondisaun fízika kuaze aat totál, nune’e iha tempu udan tahu ho rai henek mak nakonu iha laran hodi difikulta tebes bee atu halai ba natar laran.

Notísia relevante: Natar ektare rihun 13-resin iha Maliana abandona

“Ita-nia dadus tinan kotuk agrikultór iha Marco ne’e 90-resin ho nia natar 200 ektare, natar sira ne’e agora maioria abandona, tanba irrigasaun ladi’ak, tahu ho rai-henek mak nakonu, komunidade sira oituan de’it mak halo natar, ne’e mós sira esforsu tula bee ba kanu ida klaran ne’e, sira srvisu voluntáriu de’it,” nia informa ba jornalista sira, kinta ne’e.

Alfredo Meta Dau, haktuir, iha tinan kotuk ministériu konsege mobiliza ekipamentu pezadu hodi halo normalizasaun ba irrigasaun refere, maibé agrikultór sira labele halai natar tanba mákina refere mai iha fulan-marsu ne’ebé la’ós ona tempu atu halo natar.

Nia dehan, irrigasaun refere hetan estragu grave bainhira akontese udan-boot, ho ida-ne’e foin lalais iha semana liubá nia parte hato’o ona proposta ba parte kompetente atu mobiliza ekipamentu pezadu, hasai sedimentasaun iha irrigasaun laran hahú kedas hosi kanu-matan iha ponte Bulobu nia okos.

Autoridade postu ne’e haktuir, iha tinan hirak liubá ministériu kompetente halo observasaun direita kondisaun irrigasaun iha terrenu.

“Sira mai sukat tiha, maibé lahatene loos bainhira mak Governu Sentrál mai konstrui foun irrigasaun ba komunidade Cailaco. Ita-nia povu tinan-tinan halerik irrigasaun, difikulta sira atu tula bee ba natar, até agora mós ita-nia irrigasaun seidauk di’ak.”

Natar-Nain suku Meligo, Marciana Sose Mau, reforsa, iha tinan hirak ba kotuk natar ne’ebé sira halo hatudu produsaun di’ak ho rezultadu kada ektare bele atinje karon mutin kilograma 50, maibé daudaun ne’e produsaun laiha, tanba abandona tinan 10 ona.

“Ami la halo tanba bee dalan mak ladi’ak, bee iha maibé irrigasaun atu ba natar ne’e mak ladi’ak, ne’ebé ami husu ba governu ajuda lowder ne’e mai halo irrigasaun ne’e di’ak, atu ami bele halo natar tinan tinan, tanba agora ami hola de’it foos ho kolgrama 20 ne’e $20, ami sosa labele,” nia katak.

Tuir observasaun Jornalista Agência TATOLI iha terrenu notak katak, agrikultór sira parte suku Manapa daudaun ne’e idak-idak fila-rai atu halo natar ba époka dahuluk 2024 nian, tanba bee hosi mota sufisiente hela.

Notísia relevante: CAFI aprova ona projetu irrigasaun Maliana II

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!