iklan

SOSIEDADE SIVĺL

PR Horta-PM Xanana sei simu Papa Francisco iha aeroportu Comoro

PR Horta-PM Xanana sei simu Papa Francisco iha aeroportu Comoro

Amu Papa Francisco realiza enkontru ho enviadu Espesiál Extraordináriu Prezidente Repúlika, Kay Rala Xanana Gusmão, iha loron 25 agostu ne’e. Imajen/epesiál.

DILI, 09 jullu 2024 (TATOLI)–Reprezentante Vatikanu iha Timor-Leste, Nunsiu Apostólika, Monseñor Apostólika Marco Sprizzi, hateten tuir oráriu no tuir planu, Xefe Estadu José Ramos Horta no Xefe Governu Kay Rala Xanana Gusmão mak sei simu Papa Francisco iha Aeroportu Internasionál Prezidente Nicolau Lobato, Comoro, Dili.

Tuir oráriu ne’ebé Vatikanu lansa foin dadauk ne’e haktuir, Papa Francisco sei to’o iha Timor-Leste iha segunda (09 setembru 2024), iha tuku 14h15 lorokraik, hafoin hala’o vizita pastorál iha Jakarta no Papua Novaguine iha loron 03-09 setembru 2024.

“Papa to’o iha Timor, sei simu hosi Prezidente Repúblika, Primeiru-Ministru hamutuk ho membru Governu no autoridade igreja liuliu Koordenadór Jerál, Dom Vírgilio Kardeál do Carmo da Silva, Prezidente Episkopál Dom Norberto Amaral no bispu dioseze Baucau Dom Leandro Maria. Sira sei ofisialmente simu hodi igreja Timor nia naran,” Reprezentante Vatikanu iha Timor-Leste ne’e hateten liuhusi konferensia imprensa, ne’ebé realiza iha iha Episkopál, Lecidere, tersa ne’e.

Prezidente Repúblika, José Ramos Horta, hala’o enkontru ofisiál dahuluk ho Papa Francisco iha Basílica Santa Marta, sidade Vatikanu, segunda (22 janeiru 2024) ne’e. Imajen/Mídia PR.

Husi aeroportu, diretamente Papa sei ba rezidensia ofisiál Papa nian iha Nunsiatura Apostolika Motael, no iha lorokraik ne’e Papa sei halo vizita kortezia ba Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili.

“Iha 18h30 lorokraik, Papa sei iha enkontru bilaterál ho Prezidente Repúblika, José Ramos Horta no iha mós enkontru ho sosiedade sivil (líder relijiaun seluk iha TL) iha tuku 19h30 iha Palásiu Prezidensiál. Reprezentante sosiedade timorense atu enkontru atu rona diskursu Papa nian kona-ba polítika, sosiál, fraternidade no seluk tan,” nia dehan.

Iha loron daruak, tersa (10 setembru 2024), iha tuku 08h45, Papa Francisco sei hala’o vizita pastorál hodi halao enkontru ho madre sira husi kongregasaun ALMA ne’ebé hamatan ba labarik orfonatu ka labarik ema ho defisiénsia sira liuliu labarik sira-ne’ebé enfrenta moras autizmu, iha Pantai Kelapa, Dili.

“Hanesan imi koñese, Papa Francisco hanesan igreja hotu hatene, nia iha kuidadu espesiál ba ema sira ne’ebé frajil. Ida-ne’e simbólu atensaun igreja ba ema sira-ne’ebé frajil liu,” nia hateten.

Iha tuku 09h30 dadeersan, Papa Francisco sei to’o iha igreja Nossa Senhora Imaculada Conceição Katedrál, Dili, hodi hala’o sorumutu ho bispu sira, padre no madre sira, seminarista sira, katekista sira, leigus sira, animadór envolvida sira iha pastorál igreja nian,” reprezentante Vatikanu ne’e dehan.

Iha enkontru ne’e, iha mós dezenvolvimentu orasaun, diskursu Prezidente Episkopál Timorense, Dom Norberto Amaral hanesan saudasaun ida ba Papa Francisco no amu Papa mós sei hato’o nia diskursu.

Iha lorokraik, iha tuku 15h45, Papa Francisco sai husi Katedrál ba iha Tasi-Tolu, ne’ebé sei selebra misa solene ho sarani sira iha tuku 16h10 lorokraik.

Arsebispu Arkidioseze Metropolitana Dili, Don Virgílio do Carmo da Silva, SDB, kaer liman ho Papa Francisco iha Vatikanu. Imajen/Espesial.

Tuir Marco Sprizzi, sarani hotu-hotu sei partsipa misa hanesan iha misa sira seluk no sei laiha ema ida mak haruka sarani sira fila ba uma, tanba iha espasu natoon atu akumula sarani sira husi dioseze Dili, Baucau no Maliana hamutuk 700.000 ne’e.

Misa solene ne’e, sei termina iha tuku 18h00 no Papa sei la’o haleu sarani sira ho karreta Papa Movel durante minutu 30 ka 40 nia laran, hodi fó bensaun ba labarik, ferik-katuas no foinsa’e sira no sarani tomak.

“Ida-ne’e atu iha kontatu proximidade ho susesór São Pedro. No, iha tuku 9h15, Papa Francisco fila-fali (regresa) ba nunsiatura apostolika Motael hodi deskansa,” nia dehan.

Iha kuarta (11 setembru 2024), Papa Francisco sei sai husi nunsiatura iha tuku 09h20 hodi hakat ba iha Sentru Konvensaun Dili (CCD, sigla portugés) hodi hasoru malu ho reprezentante foinsa’e sira hamutuk 3.000.

“Papa sei ba rona testemuñu joven sira-nian kona-ba esperiénsia morisno pergunta foinsa’e sira-nian, no papa sei ba responde no halo diskursu. Iha ne’ebá, Papa mós sei kumprimenta foinsa’e sira atu bele hamutuk ho joven sira,” nia hateten.

Iha tuku 10h30 dadeer, Papa Francisco sei dezloka ba Aeroportu Internasionál Prezidente Nicolau Lobato, Comoro, no halo mós serimónia despedida ho Primeiru-Ministru, Prezidente Repúblika, antes semo ba Singapura.

“Iha tuku 11h15, Papa Francisco sei semo ho aviaun Aero Dili ba Singapura hodi hala’o ninia vizita pastorál iha iha Singapura,” nia dehan.

Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste

Jornalista : Jesuína Xavier

Editor        : Cancio Ximenes

 

iklan
iklan

Leave a Reply

iklan
error: Content is protected !!