DILI, 12 jullu 2024 (TATOLI)–Autoridade Nasionál Komunikasaun (ANC, sigla portugés) rekolla ona reseita hamutuk millaun $1,4 ba kofre Estadu, durante janeiru to’o juñu 2024.
“Reseita ne’ebé durante fulan-neen sira halibur ne’e maihusi pagamentu impostu ka taxa ne’ebé operadór telekomunikasaun sira hanesan Timor Telecom, Telemor no Telkomcel inklui Internet Service Provider (ISP) sira selu,” Prezidente interinu ANC, Flávio Neves, infoma ba Agência Tatoli, iha ninia knaar fatin, Caicoli, sesta ne’e.
Kada operadór no ISP selu taxa 2% husi sira-nia rendimentu ba ANC, ne’ebé kontribuisaun ne’e bele hasa’e reseita doméstika.
“Ita-nia predisaun to’o dezembru bele hetan millaun $2 resin,” nia akresenta.
Notísia relevante : ANC rekolla reseita rihun $69 iha trimestre dahuluk
Progresu seluk husi ANC mak daudaun ne’e kolabora hela liña ministeriál sira hodi kria regulamentu ba fibra ótika. Bainhira instalasaun kabu submarinu finaliza tenke iha regulamentu ida ba operadór telekomunikasaun no utilizadór internet.
“Tanba ne’e Governu deside ona sei estabelese ajénsia ida atu toma konta nune’e atu garante katak antes fibra ótika ne’e to’o mai Governu mós tenke finaliza ka kria regulamentu sira,” Prezidente ANC tenik.
ANC iha tinan 2023 rekolla reseita $2.678.967,84 ba kofre Estadu, ne’ebé reseita sira ne’e maihusi operadór telekomunikasaun tolu inklui empreza ualu hanesan Gardamor ISP, Lda, Adapaun Metrolink, Lda, Raph Vision Electronic Unip, Lda, Sacom Tel, Lda, Marapido Net Unipessoal Lda, Apurva Unipessoal, Lda, Megtelco, Lda, no Kacific Broadband Satellite Unipessoal, Lda, ne’ebé oferese servisu internet.
ANC nu’udar autoridade legál ida ne’ebé estabelese liuhusi dekretu-lei númeru 15/2012 kona-ba regulamentu setór telekomunikasaun.
Autoridade ne’e nu’udar institutu públiku ho personalidade jurídika, ne’ebé iha autonomia administrativa no finanseira, iha orsamentu no patrimóniu própriu, ho objetivu atu ezerse funsaun hanesan entidade reguladora setór telekomunikasaun.
Jornalista : Arminda Fonseca
Editora : Julia Chatarina
