BOBOBARO, 10 jullu 2024 (TATOLI) – Governu liuhosi Sekretáriu Estadu Peska, Domingos da Conceição dos Santos ‘Makaro’ hamutuk ho Reprezentante Embaixadór Brunei Darusalam mai Timor-Leste, Nasir Latif, kuarta ne’e kolleta hare BDR-5 iha aldeia Samelaun, suku Ritabou, postu administrativu Maliana, munisípiu Bobonaro.
Sekretáriu Estádu Peska, Domingos da Conceição dos Santos, esplika atividade kolleta ne’e hanesan faze pilotajen dahuluk atu koko dezenvolvimentu hare ibrida neʼebé apoia husi nasaun Brunei Darusalam
Notísia relevante: Irrigasaun la funsiona, natar ektare 550 iha Cailaco falla koleta
“Ita koko nnia dezenvolvimentu di’ak ka lae, kuandu di’ak sei kontinua dezenvolve extende tán ba iha fatin seluk neʼebé poténsia atubele haree ninia rezultadu produsaun, ita haree hare husi ninia musan bokar, depois nia buras loos, ita espera husi nia dezenvolvimentu ne’ebé mak oras ne’e iha tiha ona, ba oin ne’e sei di’ak liutan, tanba sei orgánika,” nia ko’alia iha Maliana.
Nia dehan, tinan ne’e rezultadu produsaun hare iha fatin barak hatudu progresu di’ak oituan tanba ne’e nia dezafia natar na’in-sira iha munisipiu Bobonare no munisípiu sira seluk atu nafatın iha vontade halo patar no hasa’e produsaun hare.
Reprezentante Embaixadór Brunei Darusalam mai Timor-Leste, Nasir Latif, informa apoia ne’e atu hametin liután relasaun bilaterál entre nasaun rua liliu iha setór agrikultura.
Nasir Latif fundamenta, bainhira faze pilotajen ne’e hatudu rezutadu di’ak governu Brunei Darusalam kontinua apoia tán fini ba munisipiu sira seluk hodi dezembolve kresimentu ekonomia Timor-Leste nian.
“Fini ne’ebé lori mai ne’e kilograma 3 de’it tanba inisiativa ida-ne’e mai atu halo projetu pilotu, entaun ho ida-ne’e halo estudu tiha lai atu identifika ninia kualidade no kuantidade depois hatene tiha mak foin bele dezenvolve, tanba Timor iha forsa intermu ema atubele halo serbisu, ne’ebé suporta tebes ami atu halo inisiativa ida-ne’e,” nia katak.
Prezidente Autoridade Munisípiu Bobonaro, Alexandrino Pires agradese ba governu Brunei Darusalam tanba hili munisipiu Bobonaro halo pilotajen ba fini BDR-5.
“Ita haree katak ida-ne’e di’ak, ohin dadeer ha’u koko entrevista ho estensionista sira katak kompara nia haan fulan-haat mas nia volume produsaun ke boot liu hare, sira selu ita-nia hare fulan tolu sira nia fulan haat,” nia hateten.
Nia dehan, ba oin hamutuk ho Diresaun Servisu Munisipál Agrikultura sei halo esforsu hodi introdús fini ne’e ba natar na’in-sira hotu.
Notísia relevante: CCI-TL koopera ho KADIN Indonézia dezenvolve setór agrikultura
Jornalista: Sérgio da Cruz
Editór: Evaristo Soares Martins
