DILI, 12 jullu 2024 (TATOLI)—Entre fulan-janeiru no Juñu, Departamentu Forensik iha HNGV halo autópsia ba ka kadavér ka mate-isin hamutuk 43 inklui mate isin husi sidadaun estranjeiru ne’ebé hetan asidente iha Timor-Leste, Xefe Departamentu Forensik iha Hospitál Nasionál Guido Valadares (HNGV), Nilton Tilman, relata.
“Dezde Janeiru to’o juñu kazu ne’ebé ita rejista ne’e hamutuk 43. Husi ne’e, kazu omisídiu no suisídiu ne’ebé mak familia sira lori mai atu halo autopsia iha ne’e,” Nilton Tilman informa ba jornalista sira, iha mortuariu HNGV, ohin.
Nia dehan, husi kazu sira ne’e, omisídiu mak númeru aas liu, tuir fali suisídiu, entaun kazu ne’e dalabarak akontese iha vítima sira ho idade reprodutiva sira.
“Durante fulan neen kazu omisídiu mak númeru aas liu, tuir fali suisídiu. Entaun kazu sira ne’e dalabarak akontese ba vítima sira ho idade reprodutiva sira,” nia relata.
Notísia relevante:Kazu Oho Vera, Tribunál Absolve Arguidu Na’in Haat
Pesoál forensik ne’e afirma, kazu sira ne’e mai husi munisípiu Dili, Viqueque Liquiça, Baucau, Covalima,Aileu Bobonaro, Lautem no Manatuto.
“Kazu ne’e husi Munisípiu sira iha hotu, entaun ekipa forensik halo de’it autópsia ba mate-isin sira iha kazu sira ne’ebé deskonfia omisídiu, suisídiu ka asuntu sira seluk, bainhira tribunál Supremu fó mandadu, maibé ba pasiente sira ne’ebé mate iha HNGV durante halo tratamentu, ita bolu sira mate normál,” nia haktuir.
Nia subliña, kada tinan ekipa forensik halo mós autópsia ba sidadaun estranjeiru nia mate-isin, ne’ebé dalabarak akontese iha kazu asidente sira.
Notísia relevante:Janeiru too marsu, Forensik halo autópsia ba mate-isin 22 iha HNGV
Jornalista : Felicidade Ximenes
Editór: Rafael Ximenes de A. Belo
