DILI, 12 jullu 2024 (TATOLI)—Na’in ba Skyra Coffee, Yunitha Godinho, hateten, Kompetisaun Negósiu Inovativu (KNI) II ajuda tebes nia hala’o negósiu no bele hetan rendimentu di’ak.
Nia haktuir, antes ne’e, Skyra Coffee hanesan kafetaria baibain maibé hafoin partisipa iha KNI II iha tinan 2022, ne’ebé hola parte iha projetu Youth Employment and Enrepreneruship Skiils (YEES), daudaun bele transforma ona ba Skyra Unipessoal, Lda.
“KNI II ida-ne’e ajuda tebes ami ne’ebé sei start-up hela, ha’u hola parte iha KNI II tanba iha ne’ebá ami la’os de’it hetan orsamentu maibé mós formasaun kona-ba harii negósiu, ho ida-ne’e Skyra Coffee hetan mudansa tebes, to’o agora kada fulan rendimentu ne’ebé ami hetan fulan-ida husi $3.000 to’o 4,000,” Yuanitha Godinho informa ba Agência Tatoli iha Farol, sesta ne’e.
Notísia relevante : MCI-PNUD halo fórum negósiu foinsa’e ho programa KNI
Skyra Coffee harii iha tinan 2021, hafoin ne’e iha kondisaun pandemia, kafetaria ne’e hetan efeitu maka’as hodi hetan rendimentu ki’ik tebes, maibé iha tinan 2022 bainhira partisipa iha KNI konsege hetan apoiu finanseiru $6.290 hodi konsege dezenvolve negósiu to’o agora.
Nune’e, liuhusi orsamentu ida-ne’e, Skyra Coffee konsege hasa’e nia nível negósiu no bele aumenta traballadór.
“Agora ami sai ona kompañia ida ho naran Skyra Unipessoal, Lda, ne’ebé envolve iha kafé, restaurante, catering no bar. Antes ne’e ami iha de’it pesoál na’in-rua maibé ho apoiu husi KNI ami iha ona pesoál na’in-10 no iha tan pesoál seazonál karik iha catering,” nia akresenta.
Haree ba progresu KNI nian ne’ebé di’ak tebes, nia parte husu Governu liuhusi Ministériu Komérsiu no Indústria (MKI) hamutuk ho nia parseiru Ajénsia Kooperasaun Internasionál Korea (KOICA, sigla inglés) no Programa Dezenvolvimentu Nasaun Unida (UNDP, sigla inglés) atubele kontinua nafatin programa sira hanesan KNI hodi dezenvolve planu negósiu inovativu sira.
Jornalista : Arminda Fonseca
Editora : Julia Chatarina
