DILI, 16 jullu 2024 (TATOLI)–Jestaun merkadu Taibesi identifika iluminasaun hamutuk neen (6) iha merkadu Taibesi la funisona ne’e, fó impaktu ba kontrolu jestaun merkadu iha tempu kalan.
Notísia Relevante: Negosiante faan sasán iha merkadu Taibesi ladún folin
“Lampu sira-ne’e rua de’it mak lakan iha terminál laran. Sira seluk la lakan,” Jestór Merkadu Taibesi, Carlos Borjes da Silva, hateten ba Agência Tatoli, iha merkadu Taibesi, segunda ne’e.
Merkadu Taibesi hanesan fatin konsentrasaun ba negosiante sira husi munisipiu hotu-hotu iha Timor-Leste, tanba iha terminál maibé iluminsaun la sufisiente.
Tuir nia, movimentu negosiante sira tama-sai iha merkadu Taibesi kuaze 24 oras, maibé hetan difikuldade tanba moru protesaun laiha no ho iluminasaun di’ak ne’ebé ajuda jestór merkadu sira.
Tuir nia, maioria negosiante iha merkadu Taibesi asesu ba eletrisidade ho sira-nia prepagu rasik.
Diretór Servisu Munisipál Jestaun Merkadu no Turizmu, Arthur Henriques, hateten sira-nia parte submete ona proposta ba iha Prezidente Autoridade Munisípiu Dili, maibé to’o agora seidauk iha resposta.
“Diresaun laiha orsamentu atu responde direta ba iha ne’ebá. Ami hein hela resposta husi Prezidente Autoridade Munisipál,” nia hateten ba Agência Tatoli, iha Caicoli.
Diretór ne’e hateten, PAM Dili mós sei subemete proposta ba iha Governu, bainhira iha resposta ba orsamentu mak sei halo reparasaun ba lampu iluminasaun ba lampu sira-ne’e.
Proposta ne’e, sira-nia parte aprezenta ona ba Eletrisidade De Timor-Leste, Empreza Públiku (EDTL, E.P) maibé seidauk iha resposta hodi responde ba imuminasaun sira-ne’ebé aat iha merkadu sira-ne’e.
Notísia Relevante: Vendedór merkadu Taibesi uza komunidade nia toilet selu sentavu 0,25-$1
Jornalista : Jesuína Xavier
Editór : Cancio Ximenes
