DILI, 12 jullu 2024 (TATOLI)–Vendedór iha merkadu Taibesi lamenta Governu liuliu Autoridade Munisípiu Dili (AMD) nia serbisu, tanba to’o agora la halo reabilitasaun ba toilet hitu (7) iha Merkadu Taibesi ne’ebé ho kondisaun aat totál.
Notísia Relevante: Membru PN husu AMD hadi’a jestaun merkadu Taibesi
Vendedora Marikita Boavida hateten, tanba toilet iha merkadu Taibesi la funsiona entaun vendedór sira tenke buka meiu hodi komunika ho komunidade ne’ebé hela besik merkadu ne’e, hodi uza sira-nia toilet no tenke hasai osan uitoan hodi selu,
“Toilet merkadu nian ne’e to’o agora la funsiona tanba aat hotu. Tanba ne’e, ami tenke uza komunidade ne’ebé besik merkadu ne’e nia toilet. Ami ba viziñu sira-nia uma, ami ba soe bee-kiik ka boot ne’e, selu sentavu 0.25, kuandu haris ne’e selu sentavu 0,50 no fase roupa ne’e selu $1,” vendedora ne’e hateten ba Agência Tatoli, iha merkadu Taibesi, sesta ne’e.
Marikita Boavida haktuir, vendedór sira la utiliza ona toilet iha merkadu Taibesi ne’e tinan ida (1)-resin, entaun kada ema ida-idak tenke buka meiu hodi ba komunidade nia uma atu bele hetan netik no uza sira-nia toilet.
Toilet iha merkadu ne’e konstrui husi Governu, no antes ne’e vendedór sira selu sentavu 0,10 maibé lahatene osan sira-ne’e selu ba ema selu hodi halo saida mak reabilitasaun ba fatin sira-ne’e la la’o.
Vendedór faan naan, Jose da Silva, hateten atu fasilita nia atividade hodi faan naan iha fatin faan naan nian iha merkadu Taibesi ne’e, nia sempre selu ema-nia toilet durante loron tomak halo ninia atividade negósiu.
“Toilet ne’e, ami iha ne’e ba selu ema-nian. Dalaruma ami sosa ema-nia bee-moos hodi uza ba nesesidade loro-loron nian. Ami ba soe bee-boot no kiik ne’e, selu sentavu 0.25,” nia dehan.
Nia relembra, hahú husi sira muda sai husi merkadu Hali-Laran mai iha merkadu Taibesi ne’e, sira sempre enfrenta problema bee-moos no toilet aat.
“Foufoun ami muda mai ne’e di’ak, maibé bainhira toilet sira-ne’e komesa aat ona ne’e, ema la mai hadi’a to’o ohin loron,” nia hateten.
Tanba ne’e, nia rekomenda ba Governu Konstitusionál da-sia (9) katak se reabilita fatin faan naan nian entaun kondisaun toilet no fornese bee-moos ba iha merkadu ho jestaun adekuadu, nune’e negosiante sira bele kontribui selu taxa ba Estadu.
Jestór Merkadu Taibesi, Carlos Borges da Silva, rekoñese katak preokupasaun ne’ebé vendedór sira aprezenta ne’e loos tanba kondisaun toilet iha merkadu ne’e aat hotu.
Nia hateten, toilet iha merkadu Taibesi ne’e hamutuk hitu (7) maibé agora hitu ne’e aat hotu ona, emaibé agora empreza ida mak halo hela reabilitasaun ba merkadu no ba toilet sira-ne’e.
“Merkadu ne’e mós Governu hadi’a ka reabilita ona. Reabilitasaun agora la’o hela, dala ruma outubru sira-ne’e merkadu ne’e bele funsiona ho di’ak,” nia hateten.
Tuir observasaun iha terrenu nota katak, vendedór sira iha merkadu Taibesi enxe bee ba jerigen litru lima (5) no 10 nian ne’e, ho nune’e sira bele uza bee-moos ne’e iha merkadu hodi hamoos fatin faan no produtu sira-ne’ebé sira faan ne’e.
Notísia Relevante: Empreza Walgen no Reyna reabilita merkadu Taibesi no Manleuana iha semana oin
Jornalista : Jesuína Xavier
Editór : Cancio Ximenes
