DILI, 17 jullu 2024 (TATOLI)—Prezidente Parlamentu Nasionál (PPN), Maria Fernanda Lay, akompaña husi kompozisaun meza no líder bankada Parlamentár sira, kuarta ne’e, simu audiénsia ho Ministru Administrasaun Estatál (MAE), Tomas do Rosário Cabral, atualiza preparativu atu simu Papa Francisco hala’o vizita Estadu no pastorál iha Timor-Leste.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
“Parlamentu atu resesu hanesan ita hotu hatene, Parlamentu hakarak hatene preparativu ba vizita Amu Papa Francisco nian. Ha’u esplika ba sira, iha komisaun rua, komisaun ida altu nível instituisionál ne’e Vátikanu mak harii. Amu Marco Sprizzi reprezentante Vátikanu no Amu Kardeál reprezenta Igreja lokál ho Estadu ka Governu Timor-Leste reprezenta husi Ministru Agio Perreira, no komisaun ne’e atu halo serbisu koordenasaun rai-laran ho Vatikanu ba ajenda atividade vizita Amu Papa nian,” Ministru Administrasaun Estatál (MAE), Tomas do Rosário Cabral, hateten ba jornalista sira hafoin ramata sorumutu ho PPN iha sala konferénsia PN.
Nia dehan, iha komisaun organizadora ida no ida-ne’e la’ós Governu mesak maibé ho igreja lokál.
“Horisehik ami na’in-rua (2) asina akordu entendimentu, diploma konjunta ida hodi komisaun organizadora bele serbisu ho didi’ak, ne’e atividade ba vizita Amu Papa,” nia dehan.
Daudaun ne’e, nia dehan, preparativu sira hanesan konstrusaun altar iha Tasi-Tolu ne’e atinje ona 80%.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Nelson de Sousa
Editór : Cancio Ximenes
