DILI, 18 jullu 2024 (TATOLI)—Diretora Rekursu Umanu iha Ministériu Edukasaun (ME), Anita Tavares, informa, iha aplikante hamutuk na’in-2.442 liu teste bolsa kandidatu profesór ba faze daruak, husi kandidatu 6.547 ne’ebé mak partisipa teste.
“Husi 2.442 ne’e kompostu husi feto 1.536 no mane 906. Totál 4.105 ne’ebé kompostu husi feto 2474 no mane 1.631 mak la pasa iha teste bolsa kandidatu,” Diretora Anita, hateten iha salaun ME, Vila-Verde, kinta ne’e.
Totál kandidatu ne’ebé tama iha kritériu teste bolsa kandidatu ne’e hamutuk 7.565, ne’ebé kompostu husi feto 4.575 no mane 2.990, maibé ikus mai kandidatu 6.547 kompostu husi feto 4.010 no mane 2.537 mak partisipa iha teste.
“Entaun sira ne’ebé la marka prezensa iha teste bolsa kandidatu ne’e hamutuk 1.018,” nia akresenta.
Kandidatu ne’ebé la pasa iha teste bolsa kandidatu ne’e la’ós kestaun ME nia tanba ida-ne’e hanesan konkursu públiku.
Kona-ba kolokasaun ME liuhusi Diresaun Rekursu Umanu halo hela preparasaun bazeia ba kuadru pesoál ne’ebé iha.
“Ita haree ba nesidade kolokasaun bazeia ba kuadru pesoál ba ME. Ida-ne’e ita sei serbisu hamutuk ho Diretór Servisu Edukasaun munisipál sira tanba sira mak iha terrenu, entaun sira mak identifika no hatene didi’ak nesesidade iha eskola sira ne’ebé presiza duni manorin bazeia ba kuadru pesoál ne’ebé iha. Ita sei urjentemente koloka no daudaun ne’e ami halo hela preparasaun ba kolokasaun nian,” nia tenik.
Notísia relevante : Membru PN husu ME aselera prosesu vaga bolsa kandidatu faze daruak
Ministru Edukasaun interinu, Domingos Lopes Lemos, hateten, parte ME kontinua ba teste bolsa kandidatu profesór faze daruak tanba ho objetivu atu prense vaga 2.499 ne’ebé prepara.
“Lista profesór ne’e sei uza hodi priense vaga kuadru pesoál ne’ebé kada eskola ensinu báziku presiza. Ne’e hanesan marka importante iha ita-nia kompromisu kontinua ho edukasaun no dezenvolvimentu kualidade profesór nian,” nia dehan.
Tuir kuadru pesoál ministériu no despaisu ministeriál númeru 19/2024 13 maiu ne’ebé fó sai ona husi ME katak, ensinu báziku primeiru no segundu siklu ne’e presiza profesór hamutuk 800.
Purtantu ME nia planu ba rekrutamentu tinan ne’e hamutuk vaga 2.400.
Prezidente Komisaun Funsaun Públika (KFP) Agostinho Letêncio, hateten, teste bolsa kandidatu profesór ba faze daruak ne’e la’o ho transparánsia.
“Ita hotu hatene katak prosesu selesaun ida-ne’e KFP hakarak garante transparánsia, tanba prosesu selesaun ida-ne’e la bazeia ba interrese se nia de’it, laiha nepotizmu, ita laiha familiarizmu, no garante de’it katak prosesu ida ne’e ita-boot sira rasik mak define katak ita-boot sira pasa ka la pasa liuhusi komputadór ne’ebé iha,” dehan prezidente KFP,” nia dehan.
Tanba ne’e mak fasilidade hotu ne’ebé KFP prepara atu garante katak prosesu no desizaun hotu-hotu depende ba kandidata sira.
“Tanba ita laiha interrese sira seluk, ita la ha ona rekomendasaun. Fasilidade hotu ne’ebé KFP prepara atu responde ba transparánsia no kualidade atu halakon tiha buat ida ne’ebé bolu dehan nepotizmu, familiarizmu no interese privadu,” nia tenik.
Jornalista : Osória Marques
Editora : Julia Chatarina
