Vatikanu hato’o pedidu ba Jova reabilita tan sala rua iha CCD
DILI, 18 jullu 2024 (TATOLI)–Jerente Empreza Jova Construction Unipessoal Lda, Jaime D.S Gusmão, hateten vatikanu hato’o pedidu daruak nian ba empreza atu reabilita tan sala rua (2) iha Sentru Konvensaun Dili (CCD) hodi prepara ba ekipa igreja, médiku no seguransa vatikanu nian.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Papa Francisco sei vizita Timor-Leste iha 09-11 setembru 2024 no tuir oráriu ba vizita pastorál nian ne’e, Papa sei hala’o sorumutu ho reprezentante juventude sira iha Timor-Leste, iha kuarta (11 setembru 2024), tuku 09h30, iha Sentru Konvensaun Dili.
“Ami hahú ohin halo reabilitasaun bazeia ba rekomensaun foun ne’e. Iha loron tolu liubá, sira mai fó rekomendasaun ne’e, entaun urjentemente ami book daudaun ona uma kiik rua (2) iha laran ne’e,” Jerente Empreza Jova Construction Unipesoál, Lda, Jaime D.S Gusmão, hateten ba Agência Tatoli, liuhosi telefónika, kuarta ne’e.
Nia esplika, empreza prepara ona tapeti (karpet) foun ba uma rua ne’e, no nahe azulezu no tapeti ba meeting room iha Sentru Konvensaun Dili (CCD) nian ne’e.
Uma rua ne’e, ho medida metru 21×8 no husi uma rua ne’ebé empreza halo hela reabilitasaun ne’e tanba tapeti no tetu anteriór ne’e aat hotu ona.
“Tetu uma no tapeti aat hotu ona. Agora, ami sobu hotu no hola fali ona foun atu monta fali bá. Iha semana oin hanesan ne’e, ami bele monta hotu no pinta fila-fali ona,” nia dehan.
Nia haktuir, obra reabilitasaun ba Sentru Konvensaun Dili (CCD) ne’e atinje ona 100% no obra reabilitasaun foun ba uma rua ne’e sei termina iha fulan-agostu nia hahú.
Notísia Relevante: Reabilitasaun CCD atinje 75%
Jornalista : Jesuína Xavier
Editór : Cancio Ximenes
