OÉ-CUSSE 19 jullu 2024 (TATOLI) – Ministériu Saúde (MS) fó formasaun ba profisionál saúde sira iha Rejiaun Administrativa Espesiál Oé-Cusse Ambeno (RAEOA), durante loron 16 to’o 19, kona-ba oinsá atu halo kontrolu no prevene infesaun husi moras iha instalasaun saúde sira.
Sekretáriu Rejionál ba Asuntu Saúde, Luís de Jesus, dehan formasaun ne’e bele hasa’e profisionál saúde sira-nia koñesimentu, nune’e bele hadi’a serbisu ne’ebé di’ak no ho kualidade iha unidade ospitalár sira.
“Bainhira ita hala’o serbisu iha ospitál, persiza kontrolu ba infesaun sira, tan ne’e mak ekipa husi nasionál mai fó formasaun, nune’e sira bele hadi’a sistema serbisu iha ospitál, liuliu halo limpeza molok halo atendimentu ba pasiente sira”, Luís de Jesus hateten iha ámbitu enserramentu ba atividade ne’e iha salaun Dominikana Oé-Cusse.
Dirijente Saúde Oé-Cusse ne informa, durante ne’e, laiha problema iha atendimentu maibé formasaun ne’e iha ne’ebé de’it persiza halo, nune’e bele aumenta pesoál saúde sira-nia koñesimentu, karuk iha serbisu mak halo falla ruma, entaun liuhusi treinamentu ne’e bele hadi’ak.
Notísia relevante: INSP fasilita formasaun ba profisionál saúde Oé-Cusse hodi kombate informasaun falsa
Formadora Paulina Pinto esplika katak formasaun ne’e atu refreska koñesimentu pesoál saúde sira-nia, liuliu atu halo prevensaun no kontrolu ba infesaun sira.
“Materia durante loron haat ne’e mak ita halo avaliasaun, depois ita tama ho teoria no prátika jerál oinsá mak pesoál saúde sira-bele halo prevensaun ba infesaun ba iha pasiénte sira. Ami aplika teoria no prátika bazeia ba matadalan serbisu saúde, liuliu osiptál no sentru saúda sira, hanesan jestaun klíniku ne’ebé ita persiza atu hatene”, nia esplika.
Tuir nia, formasaun ne’e nia alvu ba médiku, enfermeiru, parteira tékniku aliádu no sira husi lojístika ne’ebé responsavel ba área lavandaria no clinic service nian.
Oé-Cusse iha opsitál referénsia ida, sentru saúde lima no postu saúde hamutuk 20.
Notísia relevante: CFP observa Servisu Saúde Oé-Cusse laiha problema kona-bá rekursu umanu
Jornalista: Abílio Elo Nini
Editora: Maria Auxiliadora
