World Vision halo simulasaun protokolu asaun sedu ba inundasaun iha Bobonaro
BOBONARO, 23 jullu 2024 (TATOLI) – Parseiru Ajénsia World Vision Austrália Humanitaria Partnership, tersa ne’e organiza atividade simulasaun protokolu asaun sedu ba asaun antisipatóriu inundasaun ba Autoridade Protesaun Sivíl, instituisaun ne’ebé serbisu ba dezastre no autoridade munisipál Bobonaro nian.
Simulasaun ne’e hanesan faze ikus oinsá atu koko senáriu sira hodi haree no avalia fali, karik buat hotu loos ona mak foin bele halo validasaun ba protokolu asaun antisipatóriu ne’ebé sei uza ba pilotu programa husi Word Vision nian iha aldeia Suri-ubu, suku Goulolo, postu administrativu Cailaco no suku Ilat-laut, postu administrativu Bobonaro.
Programa ne’e realiza objetivu atu salva ema-nia vida ho efetivu liután bainhira akontese inundasaun.
Diretór Gabinete Relasaun Externa no Komunikasaun APC, Cesario da Silva Marques, apresia no louva ho programa World Vision nian tanba bele ajuda no serbisu hamutuk ho governu hodi salva komunidade nia vida bainhira akontese inundasaun.
Notísia relevante: FAO fasilita formasaun asaun antesipa dezastre ba formadór 25
“Asaun antisipatóriu ida-ne’e mais importante ba ita hotu, ita antesipa antes depois akontese buat ruma, ita fó ona hanoin ba komunidade sira sai modalidade ida oinsá atu hasoru asaun sira ne’e,” nia hateten iha salaun enkontru Cruz Vermelha Filiár Maliana.
Diretór Protesaun Sivíl no Jestaun Dezastre Naturál Munisípiu Bobonaro, Armindo Vicente, hateten programa ne’e importante tebes tanba suku rua ne’e tinan-tinan sai risku ba inundasaun.
Diretór Armindo konsidera liuhusi atividade simulasaun ne’e bele hamenus kauza husi dezastre bainhira udan no halo jestaun ba risku dezastre.
“Ita hatene katak tinan-tinan bainhira tempu udan, aldeia Suri-Ubu, suku Goulolo, ne’e hanesan tarjetu ba inundasaun nian, entaun liuhusi atividade simulasaun ne’e mós atu fó hanoin, fahe informasaun ba komunidade, hafanun sira ho ita-nia atividade sira-ne’e, nune’e bainhira akontese inundasaun, sira bele hanoin salva sira nia-aan, salva sira-nia maluk no ema defisiente sira,” nia fó hanoin.
Enkuantu antes ne’e World Vision mós monta ona sinál alerta sedu ba suku sira iha Bobonaro ne’ebé risku ba inundasaun.
Notísia relevante: Uma-kain 20 iha Bobonaro vítima ba dezastre naturál
Jornalista: Sérgio da Cruz
Editór: Evaristo Soares Martins
