KM fó poder ba Ministru Marcos da Cruz atu asina kooperasaun agríkola ho Xina
DILI, 24 jullu 2024 (TATOLI)- Konsellu Ministru hala’o sorumutu iha Palásiu Governu Dili, kuarta ne’e, delibera hodi fó podér tomak ba Ministru Agrikultura, Pekuária, Peskas no Floresta (MAPPF), Marcos da Cruz, atu asina akordu entre Timor-Leste no Ministériu Agrikultura no Asuntu Rurál Repúblika Populár Xina kona-ba Konsolidasaun Kooperasaun Agríkola.
“Memorandu Entendimentu ida-ne’e ho objetivu atu hametin kooperasaun agríkola ho forma pragmátika, hadi’a seguransa ai-han, promove dezenvolvimentu ekonómiku no sosiál no hasa’e moris-di’ak populasaun nasaun rua ne’e nian,” tenik iha nota ne’ebé Agência TATOLI asesu husi portál Governu.
Iha parte seluk, Konsellu Ministru delibera mós atu fó podér tomak ba Sekretáriu Estadu Komunikasaun Sosiál, Expedito Dias Ximenes, hodi asina memorandu entendimentu ida entre Repúblika Demokrátika Timor-Leste no Administrasaun Rádiu no Televizaun Nasionál Repúblika Populár Xina, ba kooperasaun iha ámbitu rádiu no televizaun.
Notísia relevante:TATOLI,I.P-RTTL,E.P sei selebra akordu servisu hamutuk ho Xina Media Group
Jornalista: Hortencio Sanchez
Editór: Rafael Ximenes de A. Belo
