DILI, 24 jullu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu PLP, Helder Freitas ‘Kamarudi, husu Ministériu Saúde (MS) atu tau atensaun ba postu saúde tolu (3) iha munisípiu Ermera laiha profisionál saúde.
“Ami komisaun F (ne’ebé trata asuntu Saúde iha PN) ba fiskalizasaun kona-ba saúde nian iha Ermera, iha 10-11 Jullu 2024 ne’e, Diretór saúde munisípiu Ermera hateten ai-moruk balun falta maibé sufisiente, maibé falta rekursu umanu tanba postu saúde tolu rekursu laiha atu koloka ba postu saúde ne’e,” nia levanta liuhusi reuniaun plenária komisaun permanente iha sala plenária Parlamentu Nasionál, kuarta ne’e.
Deputadu membru komisaun F ne’e hateten, iha 11 fulan-jullu fahe ba grupu rua hodi hala’o fiskalizasaun, hanesan iha grupu ida ba postu administrativu Hatulia no grupu ida ba postu Letefoho.
Nia dehan, xefe sentru saúde Letefoho mós hato’o ba deputadu membru komisaun sira katak kondisaun rezidénsia ba profisionál saúde sira-ne’e ladi’ak hotu ona, tanba zinku no plafon kuak hotu no parede mós aat hotu ona.
“Tanba ne’e husu ba Governu da-sia, liuliu ba Ministériu Saúde (MS) tau orsamentu iha tinan 2025 hodi bele rezolve preokupasaun sira-ne’e,” nia rekomenda.
Entertantu, iha reuniaun plenária komisaun permanente ne’e reprezentante Governu liuliu Vise-Ministru ba Asuntu Parlamentár, Adérito Hugo da Costa, la marka prezensa maibé tékniku sira de’it mak marka prezensa hodi rejista preokupasaun Deputadu sira-nian, nune’e sei enkamina ba ministériu tutela atu bele tau atensaun.
Enkuantu, antes ne’e, liuhusi audiénsia komisaun F iha PN ho Vise-Ministru ba Fortalesimentu Instituisionál Saúde, José dos Reis Magno, Deputadu sira mós rekomenda ba MS atu aumenta profisionál saúde iha sentru no postu saúde sira iha territóriu
Tuir fiskalizasaun, komisaun haree katak sei falta rekursu umanu profisionál saúde liuliu médiku, enfermeiru, parteira, farmasista sira, entaun parte Vise-Ministru hato’o rejista preokupasaun no sei tau iha planu orsamentu hodi bele halo rekrutamentu.
Notísia Relevante: Membru PN husu MS rezolve lalais problema aimoruk “stock out”
Jornalista : Nelson de Sousa
Editór : Cancio Ximenes
