DILI, 25 jullu 2024 (TATOLI)–Ministru Planeamentu, Investimentu Estratéjiku (MPIE), Gastão Sousa, orienta benefisiáriu husi programa bolsa hakbiit sira atu buka dadus afetadu ba desizaun Governu nian ne’ebé revoga bolsa hakbiit hodi muda ba parsiál.
Portavós bolseiru hakbiit, José da Costa, hateten, desizaun ne’e halo estudante lubuk ida mak sofre no la kontinua estudu tanba estudante maioria hela iha kos no inan-aman ho kondisaun kbiit laek.
“Ami ohin mai hasoru malu ho MPIE atu solusiona ami-nia problema ne’ebé ami hasoru iha baze. Maibé ohin Ministru rasik orienta fali ami atu bá buka dadus kona-ba estudante sira ne’ebé sai vítima ba desizaun Governu revoga bolsa hakbiit ba parsiál ne’e. Ne’ebé ami prontu no koopera ho sira no ami sei ba iha kada universidade sira buka dadus ba ami-nia maluk sira ne’ebé sai afeta ba desizaun injustu ida-ne’e,” Portavós bolseiru hateten hafoin hasoru malu ho Ministru Gastão Sousa, iha Fatuhada, kinta ne’e.
Nia dehan, estudante sira sei luta nafatin to’o hetan solusaun ba sira-nia problema, tanba sira barak mak kbiit laek nia oan ne’ebé mak hakarak tebes asesu ba edukasaun.
“Ami la konkorda ho bolsa parsiál no ami sei nafatin luta hodi hetan solusaun. Tanba bolsa parsiál ne’e ezatamente ami povu kbiit laek nia oan labele asesu ensinu aprendizajen iha ensinu superiór, tanba ita hela iha kapitál Dili, la’ós de’it atu selu eskola, maibé oinsá ho nesidade báziku sira. Ami hala’o estudu iha kapitál hanesan Dili no munisípiu, la’ós de’it selu eskola, maibė mós presiza sosa ai-han, selu kós, selu bemo, sosa livru, pulsa internet, print, fotokopia no nesesidade sira seluk ne’ebé bele fasilita estudu estudante kbiit laek nian. Tanba ne’e, ami sei buka dadus to’o hetan hodi mai aprezenta fali ba MPIE atu fó solusaun,” nia akresenta.
Notísia relevante : FDCH konvida benefisiáriu bolsa parsiál asina kontratu iha loron 01-31 jullu
Estudante ne’e konsidera, edukasaun nu’udar direitu báziku ba timoroan hotu hodi bele asesu hahú husi pre-primária to’o ensinu superiór ne’ebe estipula iha lei Konstituisaun RDTL artigu 59. Edukasaun nu’udar setór ida-ne’ebé importante liu iha ámbitu prosesu kontrusaun estadu.
Nune’e, Estadu kria polítika públika oin-oin hodi tulun ka salva timoroan sira hotu atu asesu ba edukasaun atu sidadaun hotu tenke matenek iha nia rain rasik.
“Tanba ne’e, ami la konkorda ho desizaun Governu no ami nafatin luta ba desizaun injustu ida-ne’e to’o hetan solusaun,” nia tenik.
Hafoin MPIE ramata enkontru ho reprezentante bolseiru hakbiit, parte mídia tenta atu entrevista ho Ministru, Gastão Sousa, maibé ninia protukolu la autoriza atu halo entrevista tanba dehan Ministru okupadu hela.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e so fó apoiu de’it ba kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Bolsa hakbiit kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Enkuantu, ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Jornalista : Osória Marques
Editora : Julia Chatarina
