DILI, 26 jullu 2024 (TATOLI)–Koordenadór Lojistika Konferénsia Episkopál Timorense ba vizita Pontífise nian, Padre Ângelo Salsinha, hateten Komisaun Organizadora (KO) simbolikamente entrega kamizola ho imajen Papa Francisco nian hamutuk rihun 200 ba Dioseze Baucau, Díli no Maliana.
Notísia Relevante: Igreja Katólika la admite komersializa produsaun kamizola ba vizita Papa Francisco
Kamizola ba vizita Papa nian ne’e, nia dehan, atu distribui ba sarani sira husi dioseze tolu ne’ebé sei partisipa iha eventu pastorál Santu Padre nian iha loron 09 setembru to’o 11 setembru 2024 ne’e.
“Tuir desizaun ne’ebé ita deside ona mak dioseze ida-idak hetan kamizola rihun 200,” Kordenador Lojistika Konferensia Episkopal Timorense, Padre Ângelo Salsinha, hateten ba jornalista sira iha Motael, sesta ne’e.
Nia esplika, distribuisaun kamizola ne’e tuir númeru kada dioseze ne’ebé ekipa Komisaun organizadora rekolla ona.
Aleinde ne’e, nai dehan, komisaun organizadora mós sei distribui xapeo no salurik ba kada dioseze.
Antes ne’e, ekipa Komisaun organizadora relata katak Governu no igreja prepara kamizola rihun 700 ba sarani sira-ne’ebé atu partisipa iha misa solene ne’ebé Papa Francisco prezide iha Tasi-Tolu, 10 setembru, iha tuku 16h30 lorokraik.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Jornalista : Jesuína Xavier
Editór : Cancio Ximenes
