Papa vizita TL: Governu Austrália apoia tanke bee 60 fasilita sarani sira
DILI, 26 jullu 2024 (TATOLI)–Governu Austrália liuhusi Embaixada Austrália iha Dili entrega tanke bee nian hamutuk 60 ba Timor-Leste liuhusi Komisaun Organizadora iha Sekretariadu Komisaun Alto Nivel Institusionál Vizita sua Santidade Papa Francisco nian mai Timor-Leste, iha Motael, Dili.
Notísia Relevante: KO entrega kamizola vizita Papa Francisco rihun 200 ba dioseze Dili-Baucau-Maliana
Embaixadora Austrália iha Timor-Leste, Caitlin Wilson, hateten Austrália haksolok fó apoiu atu halo parte iha preparasaun hodi fasilita sarani sira asesu bee iha vizita Papa nian nu’udar kompromisu ida katak “Ha’u hakarak Timor-Leste sai roman iha setembru”.
“Governu Timor-Leste, igreja no grupu iha komunidade halo esforsu no ba preparsaun atu simu vizita Santu Padre Francisco. Australia oferese tanke bee nian ne’e, ami sei serbisu hamutuk ho Governu iha preparasaun ne’e atu ema sira-ne’ebé partisipa iha eventu importante ne’e bele asesu ba bee,” Eembaixadora Austália iha Timor-Leste, Caitlin Wilson, hateten iha nia diskursu, iha Motael, sesta ne’e.
Iha fatin hanesan, Koordenadór Lojistika Konferénsia Episkopál Timorense, Padre Ângelo Salsinha, hateten tanke bee sira-ne’e sei hatuur balun iha Tasi-Tolu, fatin Papa Francisco atu selebra misa solene iha 10 setembru, iha tuku 16h30 lorokraik.
“Apoiu husi Embaixada Austrália nian ne’e, tanke bee 30 sei tau iha Tasi-Tolu no restante sei tau iha fatin konsentrasaun sarani sira husi munisipiu ne’ebé konsentra iha Hera, Kasnafar-Beduku no Tibar,” nia dehan.
Padre ne’e hateten, tanke bee nian ne’e sei garante hodi responde ba iha nesesidade sarani sira-nian ne’ebé sei konsentra iha fatin konsentrasaun ba sarani sira husi dioseze Baucau konsentra iha Hera, dioseze maliana konsentra iha Tibar no dioseze Dili liuliu husi Manufahi-Ainaro no Aileu ne’e sei konsentra iha Kasnafar-Beduku.
Notísia Relevante Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Câncio Ximenes
