OÉ-CUSSE, 29 Jullu 2024 (TATOLI) – Entre Agostu no Setembru 2024, Tribunál Distritál Oé-Cusse (TDO) hahú féria judisiál, tanba ne’e atendimentu sei funsiona de’it ba kazu sira-ne’ebé kategoria urjente, informa Juíz Administradór, Argentino Luisa Nunes.
“Hahú 01 agostu to’o iha 15 setembru 2024 féria judisiál, atividade sei la’o fali iha 16 Setembru 2024. Entaun, iha féria ne’e tribunál sei funsiona atu halo julgamentu ba kazu urjente sira de’it”, dehan Juiz Administradór ne’e hateten iha Tribunál Oé-Cusse, ohin.
Notísia relevante: Kazu 400-resin pendente iha Tribunál Distritál Oé-Cusse
Tuir nia, kada tinan juíz iha direitu ba feriadu no sei taka julgamentu ba prosesu sira normál, tanba ne’e atendimentu iha tribunál ba kazu normál nian sei to’o de’it iha 31 Jullu.
Nia esplika katak kazu sira-ne’ebé konsidera importante no atu atende mak hanesan, primeiru interogatóriu, sumáriu sira, no prosesu importante sira ligadu ho detensaun.
“Ita atende ba urjente de’it, hanesan TIR, iha prosesu sumáriu, ne’ebé flagrante delitu, primeiru interogatóriu, iha prosesu sivíl balun, providénsia kautelár, ne’ebé tama iha feriadu judisiál, tribunál nafatin funsiona no konsidera kazu urjente”, nia salienta.
Argentino Nunes hatutabn katak Tribunál Oé-Cusse, daudaun ne’e, iha juíz na’in-rua, fahe ona kaléndariu hodi atende kazu urjénsia sira durante feriadu.
“Kazu normál sira-ne’e, persiza pasiénsia hodi hein bainhira tribunál funsiona normál iha loron 16 Setembru 2024. Julgamentu ba iha kazu baibain ne’e hanesan arguidu sira la prezu ne’e. Só sira-ne’ebé iha komarka maske feriadu judisiál mós funsiona nafatin, liuliu diretiva tenke funsiona tanba iha lei mak prevista kedan”, nia dehan.
Notísia relevante: Molok jere tribunál Oé-Cusse, Juiz Argentino rona uluk opiniaun hosi entidade
Jornalista: Abílio Elo Nini
Editora: Maria Auxiliadora
