Komisaun Verifikasaun válida ona kombatente-mártir hosi Bobonaro ho totál 11,380

BOBONARO, 30 jullu 2024 (TATOLI) – Ministériu ba Asuntu Kombatente Libertasaun Nasionál liuhosi Konsellu Kombatente Libertasaun Nasionál (CCLN, sigla portugés) Komisaun Verifikasaun no Konsellu Veteranu Munisipál, tersa ne’e realiza enkontru ho responsável rejiaun, sub-rejiaun, zona no nurep sira iha munisípiu Bobonaro hodi asina akta aprovasaun rezultadu finál hosi desizaun verifikasaun no validasaun dadus segundu rejista tinan 2009.

Rezultadu verifikasaun no validasaun dadus segundu rejistu 2009 ne’ebé komisaun verifika hatudu katak, kombatente no mártir iha munisípiu Bobonaro validadu hamutuk  11,380 (88%) no válidu 1,060 (12%) husi totál dadus rejistadu 12,988.

Komisáriu CCLN, Alfredo Cipriano Amarál ‘Maulear’ esplika, akta ne’e nu’udar rezultadu finál ida oinsá atu aprezenta relatóriu verfikasaun dadus kombatente no mártir rejistadu 2009 ba Governu.

Notísia relevante: Governu ensera verifikasaun dadus kombatente iha Bobonaro

“Ita hotu hakmatek hodi asina de’it akta, ida-ne’e halo ita hotu hakmatek, ida hanesan relatóriu ida atu hato’o ba governu katak rejistu 2009 no verifikasaun dadus hotu ona iha munisípiu 13,entaun fó akta ida ne’e ba hanesan relatóriu ida hotu ba oin governu atu hanoin ba oin ne’e atu halo tan saida bainhira matak taka natar ita hein de’it,” Komisáriu CCLN, Alfredo Cipriano Amarál ‘Maulear’ hateten iha salaun Maria-Tapo.

Nia husu ba reponsável nurep, zona, sub-rejiaun no Rejiaun atu hamutuk neon ida de’it atu hare no tau-matan ba kombantente no mártir sira-ne’ebé terus no mate ba rai ida-ne’e, liuliu oan kiak no faluk sira.

Prezidente Konsellu Veteranu Munisípiu Bobonaro, Jaime Romao ‘Dotim’, konsidera ne’e hanesan pasu ida oinsá ba futuru atubele rezolve kombatente no mártir sira-ne’ebé durante ne’e preokupa kona-bá sira-nia direitu.

“Ita hotu hein ida-ne’e, ha’u husu imi hotu nafatin hamutuk ita-nia moris mak ne’e ita kontente ita iha fronteira ita lutu-metin, ita bele konta dehan ita ne’e jagoan ba fronteira hatene funu tanbá lutu metin,” nia katak.

Tuir dadus kombatente no mártir iha postu administrativu Atabae hamutuk 1,335, validadu 1,234 (92%), la validadu 101 (8%), Balibo  1,011, validadu 912 (90%), la validadu 99 (10%), Bobonaro  4,785, validadu 4,094 (86%), la validadu 691 (14%), Cailaco 1,679, validadu 1,575 (94%), la validadu 104 (6%), Lolotoe  2,126, validadu 1,706 (80%), la validadu 420 (20) no Maliana totál  2,050, validadu 1,859 (91%) la validadu 191 (9%).

Notísia relevante: SEAKLN enserra verifikasaun dadus kombatente iha suku Oeleu Bobonaro

Jornalista: Sérgio da Cruz

Editór: Evaristo Soares Martins