Konstrusaun moru iha merkadu Mau-Mali liu ona 50%
BOBONARO, 30 jullu 2024 (TATOLI) – Progresu fíziku implementasaun projetu konstrusaun moru iha merkadu Mau-Mali, ne’ebé lokaliza iha aldeia Samelaun, suku Ritabou, postu administrativu Maliana, munisípiu Bobonaro daudaun liu ona 50%.
Diretór Kompañia Lesuburo Unipesoál Lda, Afonso Lelo Tasi, konfirma daudaun ne’e moru haleu ona sei falta uma seguransa nia no portaun entrada.
Notísia relevante: Autoridade Bobonaro sei kontinua hadi’a merkadu Mau-Mali iha 2025
“Ha’u fiar katak liu ona 50% tanba agora to’o ona faze cor sinta-leten, depois mai iha oin uma seguransa nian ne’e mós preparasaun atu tula kuda-kuda, kalen, soké pursentu ne’e sei zero mak portaun haat iha oin ne’e, tanba ami seidauk book ami sei fokus uluk iha kotuk, kuandu hotu ona komesa book ona portaun haat ne’e ikus,” nia informa ba Tatoli iha Maliana, tersa ne’e.
Nia afirma, kompañia garante sei entrega obra ne’e ba autoridade munisipál Bobonaro iha fulan-setembru tinan 2024 ho kualidade di’ak.
Lelo Tasi subliña, durante implementasaun kompañia hasoru difikuldade tanba badaen sira ladún iha ativu.
“Ita hotu hatene badaen Timor ne’e, dalaruma kuandu ohin halo, loron rua tolu lia kona dehan ba halo lia-mate, agora badaen ita buka araska loos, ha’u atu hapara sira mós ha’u hanoin ladi’ak, tanba sira mós iha nesesidade,” nia katak.
Enkuantu moru protesaun ho medida luan metru 400 no naruk 400 ne’e gasta orsamentu hamutuk $184,718.13 no projetu ne’e tama iha Planu Dezenvolvimentu Integradu Munisipál (PDIM) tinan fiskál 2024.
Planu aturidade munisipál Bobonaro implementa projetu ne’e atu prepara kondisaun dignu ba negosiante sira halo atividade negósiu ho seguru no livre molok reativa merkadu Mau-Mali.
Notísia relevante: Autoridade Bobonaro sei kria uluk kondisaun molok muda negosiante ba merkadu Mau-Mali
Jornalista: Sérgio da Cruz
Editór: Evaristo Soares Martins
