iklan

POLÍTIKA

Membru PN husu MAE mobiliza komunidade halo limpeza simu Papa Francisco

Membru PN husu MAE mobiliza komunidade halo limpeza simu Papa Francisco

Papa Francisco. Imajen/Espesiál.

DILI, 30 jullu 2024 (TATOLI)—Membru Parlamentu Nasionál (PN) liuhusi Deputadu bankada CNRT, Domingos da Costa ‘Deker’, husu Ministériu Administrasaun Estatál (MAE) atu koordena ho ministériu sira no mobiliza komunidade atu halo limpeza, nune’e bele kria ambiente ida moos simu Papa Francisco nia vizita Estadu no pastorál iha Timor-Leste, iha 09-11 setembru 2024 ne’e.

Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste

“Husu ba Ministériu Administrasaun Estatál (MAE), atu koordena ho ministériu sira hotu no husu mós apoiu F-FDTL mobiliza komunidade hahú halo limpeza. Limpeza la’ós de’it iha sidade laran, maibé pelumenus iha estrada públiku sira hanesan iha ne’e to’o Motaain no husi ne’e ba fali Manatuto parte leste nian. Hanesan mós husi ne’e ba parte súl nian presiza haree, la presiza hein osan. Pelumenus ho preparasaun ho vizita Sua Santidade Amu Papa Francisco nian mai ita-nia rai, husu komunidade hotu-hotu atu kontribui halo netik limpeza hodi ita prepara ambiente ida moos simu ita-nia Amu Papa,” nia hato’o liuhusi reuniaun plenária komisaun permanente iha Parlamentu Nasionál, tersa ne’e.

Tanba, nia dehan, realidade ne’ebé akompaña iha terrenu iha loron sesta Governu mobiliza funsionáriu sira halo duni limpeza maibé fo’er iha fatin públiku sira kontinua iha nankari arbiru.

Vise Ministru ba asuntu Parlamentár, Adérito Hugo da Costa, dehan prezidente autoridade munisípiu lubun implementa ona ho mensajen ne’ebé iha halo serbisu limpeza iha sesta ho voluntáriu.

“Entaun, hanoin ne’e ideia di’ak tebes, nune’e sei partilla ho ministériu relevante sira hodi haree kestaun ne’e ba limpeza voluntáriu ka la liuhusi renumeratóriu ruma, ita presiza halo hanesan baibain akontese tinan barak nia laran ona,” nia dehan.

Notísia Relevante: Papa Francisco sei prezide misa solene iha Tasi-Tolu iha 10 setembru

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!