DILI, 30 jullu 2024 (TATOLI)-Tribunál liuhusi Juíz prosesu, Maria Solana, hatuun akordaun hodi deside absolve Longuinhos Monteiro husi krime forma konstumava ba arma proibida ne’ebé iha artigu 211 husi Kódigu Penál Timor-Leste.
Nia dehan, razaun Tribunál absolve antigu Komandante Polísia Nasionál Timor-Leste (PNTL) ne’e tanba durante julgamentu arguidu konfesa ba Tribunál nia rai duni arma ho item 24 maibé arma hirak ne’e la fó perigu ba ema nia vida.
“Ho nune’e Tribunál deklara absolve Longuinhos Monteiro husi krime forma konstumava arma proibida,”Maria Solana bainhira deklara iha sala julgamentu Tibunál Judisiál Primeira Instánsia, tersa ohin.
Maria Solana hateten, provadu duni katak momentu arguidu Longuinhos Monteiro sei hanesan Komandante Jerál PNTL nia hetan arma sira ne’e momentu uza ba treinamentu polísiál. Hafoin treinamentu, arguidu rai duni arma proibida iha nia rezidénsia.
Solana afirma, maibé depois arguidu nia mandatu ramata, nia husu ba nia seguransa atu haloot fali iha armoriu nasionál, maibé lakonsege.
Arguidu Longuinhos Monteiro esperiénsia barak no nia mós antes ne’e asume kargu hanesan Prokuradór Jerál Repúblika, Komandante Jerál PNTL, Ministru Interiór no Asesór Prezidente Repúblika
“Ho nune’e Tribunál entende katak maske nia rai arma sira ne’e, maibé laiha intensaun atu uza arma sira hodi fó perigu ba ema seluk, nune’e laiha duni atu aplika pena ruma ba Longuinhos Monteiro,”nia dehan.
Juíza proseu ne’e dehan, arguidu mós kestiona kona-ba prosesu buska no aprezensaun ne’ebé autoridade polísiál halo ba nia rezidénsia, Fomento ne’e la tuir rekezitu legál, maibé Ministériu Públiku iha nia akuzasaun sira katak buska no apreensaun ne’ebé autoridade polísiál halo ne’e priense rekezitu legál, tanba bazea ba mandadu husi Tribunál maibé Tribunál entende katak iha prosesu ida-ne’e Ministériu Públiku la halo dilijénsia ne’ebé kle’an ba buska no apreensaun ne’ebé autoridade polísia halo ba arguidu nia uma, tanba ne’e Tribunál konsidera faktu sira ne’e la aprovadu.
Solana hateten, iha Tribunál nia desizaun deside katak arma sira ne’ebé mak autoridade polísia halo ona apreensaun iha arguidu sira-nia rezidénsia ne’e arma sira ne’e fila ba Estadu.
“Sasan sira ne’ebé mak antes ne’e autoridade PCIC halo apreensaun iha señor Longuinhos Monteiro nia uma arma sira ne’e hotu sai afavór ba Estadu,” nia adianta.
Iha fatin hanesan, Defeza husi Longuihos Monteiro, João Pavão Serra, hateten, simu desizaun Tribunál.
“Desizaun ne’ebé ohin Tribunál foti ba ha’u-nia kliente ne’e ha’u aseita tanba ida-ne’e desizaun ne’ebé justu no ida mak ita atu hatuur justisa Timor-Leste ho loloos,”nia konklui.
Jornalista : Natalino Costa
Editór: Rafael Ximenes de A. Belo
