Projetu eletrifikasaun ba aldeia tolu iha Ritabou paradu
BOBONARO, 06 agostu 2024 (TATOLI) – Komunidade sira preokupa ho implentasaun Projetu Eletrifikasaun Komunitária ba aldeia tolu iha suku Ritabou, postu administrativu Maliana hanesan; Daitete, Mahui no Riti-udu, tanba la’o atraza no daudaun ne’e paradu hela.
Xefe aldeia Mahui, Romeo Mau, informa projetu ne’e paradu kuaze fulan ida liu ona.
Notísia relevante: EDTL implementa projetu eletrifikasaun ba aldeia tolu iha Ritabou
“Ida-ne’e ha’u sente hanesan dezafiu, problema boot ida liuliu ba ami aldeia tolu ne’e, tanba ita hatene katak ukun-aan iha tinan 22 ona, maibé até agora eletrisidade ami-nia governu seidauk tau-matan, ida agora ami halo ne’e mai hosi ami-nia hanoin raisik, ami tuur hamutuk ho EDTL mak dada,” nia informa ba jornalista sira iha Maliana, tersa ne’e.
Nia husu ba EDTL,EP atu buka solusaun hodi solusiona problema ne’e.
“Ami prontu atu koopera ho estadu nune’e serbisu voluntáriu, tanba ita-nia komunidade hakarak ahi lakan ona,” nia katak.
Koordenadór Eletrisidade Timor-Leste, Empreza Públika (EDTL,EP) Munisípiu Bobonaro, Mário de Jesus, informa, projetu ne’e paradu tanba estoke materiál iha nasionál mak mamuk ka hotu.
“Iha-ne’ebá fiu maka sei falta no materiál kik sira seluk tán, sé materiál ne’e kompletu ona parese ke semana rua hanesan ami bele konklui ona, ne’ebé husu komunidade hein ho pasiénsia oituan lai,” nia hateten.
Enkuantu komunidade iha aldeia tolu ne’ebé sei benifísia ba eletrisidade ne’e hamutuk rihun ida-resin.
Notísia relevante: EDTL Bobonaro esforsu rezolve ahi mate-lakan
Jornalista: Sérgio da Cruz
Editór: Evaristo Soares Martins
