OÉ-CUSSE, 06 Agostu 2024 (TATOLI) – Ministériu Finansa (MF), liuhusi Institutu Nasionál Estatístika Timor-leste, Instititu Públiku (INETL, I.P) lansa relatóriu finál Sensu Fó Fila Fali 2022 ba iha suku 18 iha Rejiaun Administrativa Espesiál Oé-Cusse Ambeno (RAEOA).
Relatóriu finál ne’e hatudu Oé-Cusse aumenta ema na’in-11.772 husi 68.913 iha Sensu 2015. Númeru totál uma-kain aumenta mós husi 14.345 ba 17.730. Populasaun totál iha feto 39.694 (49%) no 8.069 (10%) iha tinan 60 ka liu. Ema 44.065 (54%) ho idade entre 15 no 59, no ema 467.034 ka 35.39% ho tinan entre 0 no14.
“Administrasaun públika hanesan saúde, edukasaun, infraestrutura no finansa persiza iha mekanizmu atu rekolla, mantein dadus administrativu, tanba dadus sira-ne’e bele kompleta no ajuda ita atu halo ita-nia planeamentu”, Ministra Finansa, Santina Cardoso, hateten iha otél Ambeno.
Governante ne’e realsa katak sensu populasaun iha Timor-Leste ne’e ba da-4 ona, hahú iha 2004-2005, 2010, 2015, ikusliu mak iha 2022 ne’e.
“Investimentu ida mak ita halo daudaun ne’e, halo husi rekolla dadus. Nasaun hothotu hanesan, ita sempre bá foti dadus husi uma-kain sira atu ajuda ita halo ita-nia planeamentu no halo polítika hodi responde ba nesesidade populasaun nian”, nia afirma.
Notísia relevante: MF no parseiru lansa relatóriu temátiku neen sensu populasaun 2022
Ministra konsidera importante tebes autoridade lokál sira atu koñese situasaun moris uma-kain iha suku idaidak, tanba ko’alia kona-ba Programa Nasionál Dezenvolvimentu Suku (PNDS) persiza atu hatene bainhira aloka orsamentu ba projetu ne’ebé atu halo iha suku ne’e, hodi korresponde ba nesesidade bazeia ba dadus Sensu Populasaun 2022 nian.
“Ida-ne’e mak atu fó solusaun ba populasaun nia nesesidade, ezemplu asesu estrada, bee-moos, edukasaun, saúde no infraestrutura bázika seluk-tan”, nia salienta.
Notísia relevante: Relatóriu prelemináriu sensu uma-kain rejista populasaun millaun 1,3
Sekretária Rejionál ba Asuntu Finansa, Elvira de Carvallo Manat, ne’ebé reprezenta Prezidente Autoridade RAEOA, hateten objetivu husi projetu ne’e inspira no ajuda makaer ukun no lidér komunitáriu sira atu envolve no lori prosesu dezenvolvimentu to’o iha suku.
Tanba ne’e, ho Sensu 2022 líder idak-idak iha ona kondisaun oinsá atu ezekuta di’akliu ba objetivu ne’ebé bele oferese progresu no bein-estar ba populasaun.
“Meta ida-ne’e pertinente tebes ba ita idak-idak. Bele implementa no monitoriza progresu dezenvolvimentu iha suku. Rezultadu Sensu Populasaun 2022 funsiona hanesan alerta ida ba Governu, atualiza no halo planu ba orsamentu 2025 tuir prioridade sira. Persiza mós apoia másimu prezidente autoridade, administradór postu no xefe suku sira hodi lori prosesu dezenvolvimentu iha suku ida-idak tuir área prioritaria atu halo mudansa ba dezenvolvimentu iha área sosiál sira atu fó benefisíu direita ba komunidade”, nia realsa.
Notísia relevante: PR husu públiku kontribui dadus loloos iha ámbitu sensu populasaun 2022
Oé-Cusse hanesan rejiaun espesiál ne’ebé iha suku 18, aldeia 63 no postu administrativu haat mak hanesan Oésilo, Pássabe, Nítibe no Pante Makasar.
Jornalista: Abílio Elo Nini
Editora: Maria Auxiliadora
