OÉ-CUSSE, 07 Agostu 2024 (TATOLI) – Autoridade Aviasaun Sivíl Indonézia, liuhusi Diresaun-Jerál Aviasaun Sivíl (DGCA, sigla inglés) no Servisu Navegasaun Aérea (AirNav), sei fó asisténsia téknika ba Servisu Tráfiku Aéreu ka Air Traffic Service (ATS), liuliu kona-ba prosedimentu espasu aéreu nian iha aeroportu internasionál Rota do Sândalo, iha Rejiaun Administrativa Espesiál Oé-Cusse Ambeno (RAEOA).
“Loron rua ami diskute kona-ba asisténsia, tanba iha Timor-Leste ANATL, E.P no AACTL I.P husu asistensia téknika hodi fasilita prosedimentu Air Traffic Service iha Oé-Cusse, liuliu controlled airspace, tanba ida ne’e liga ho aviasaun”, Diretora Jestaun ba Aviasaun Sivíl Indonézia, Nurdini Tambuman, hateten hafoin termina diskusaun téknika, ohin.
Iha sorumutu ne’e aborda mós akordu kooperasaun entre Indonézia no Timor-Leste, prinsipalmente Oé-Cusse iha futuru. “Diskusaun téknika atu fó apoiu ba aviasaun no ami konkorda hamutuk sei fó asisténsia ba nesesidade jestaun espasu tráfiku aéreu”, nia adianta.
Notísia relevante: Autoridade aeroportu Rota do Sândalo no Indonézia koordena Serbisu Tráfiku Aéreu
Iha sorin seluk, Asesór Tékniku Aviasaun, Apoia Gabinete Prezidente Autoridade RAEOA, Nídio Lobato, informa rezultadu diskusaun téknika durante loron rua ne’e sei atualiza ba Prezidente Autoridade RAEOA, Rogério Tiago Lobato, no Ministru Transporte no Komunikasaun (MTK), Miguel Manetelu.
“Rezultadu pozitivu husi parte rua no Autoridade Aviasaun Sivíl Timor-Leste no ami halo diskusaun kona-ba Aerodrome Traffic Zone. Ami sei hato’o relatóriu no karta formál ida ba Prezidente Autoridade no Ministru Transporte no Komunikasaun atu deside ba oin halo oinsá. Ita aprosima Governu ho Governu, nune’e tékniku sira bele hala’o ona serbisu, liuliu espasu aéreu nian”, dehan.
Nia esplika katak aeroportu Rota do Sândalo persiza rekursu atu prepara ba halo dezeñu controlled airspace (espasu aéreu ne’ebé ho kontroladu), tanba Oé-Cusse seidauk iha no sei afeta hodi labele halo operasaun internasionál.
“Durante ne’e halo operasaun doméstika visual fligth, maibé bainhira atu halo operasaun internasionál tenke prienxe kritéria hirak-ne’e, depois bele sertifika aeroportu no dezeñu espasu aéreu nian”, salienta.
Notísia relevante: FOTO ATUÁL: Koordenasaun serbisu Tráfiku Aéreu entre Autoridade aeroportu Rota do Sândalo ho Indonézia
Nídio Lobato fundamenta katak dezeñu airspace iha nasaun hothotu tenke iha, tanba ne’e husi parte enjeñeiru RAEOA nian hamutuk ho AACTL no ANATL halo ona topográfika aeroportu nian kona-ba nia obstákulu no solusaun.
“Ne’ebé ami sei kontrata konsultan husi Austrália ka husi Indonézia, tanba durante loron rua deskusaun ne’e hetan solusaun husi parte Indonézia, liuliu DGCA ho AirNav katak sira prontu apoia”, nia dehan.
Diretór AACTL ba Asuntu Navegasaun Aérea, Carlito Noronha, esplika papél AACTL atu halo seguransa no protesaun hodi implementa regulamentu no prosedimentu ne’ebé Organizasaun Mundiál Aviasaun Sivíl fó sai.
“Oé-Cusse simu ona aviaun boot, tuir loloos labele semo maibé ita uza ona semo bá-mai Dili Oé-Cusse. Maibé, nia prosedimentu sira oinsá aviaun atu tun bainhira hasoru difikuldade ruma hanesan udan, kalohan, no atu semo oinsá ne’e ami halo diskusaun ida-ne’e. Hodi husu sira-nia asisténsia atu ajuda ita halo prosedimentu ne’e. Ita-nia espasu aéreu nasaun barak mak asesu, maibé Oé-Cusse tama iha Indonézia nia leet, entaun nia tenke iha rasik espasu aéreu”, nia katak.
Notísia relevante: RAEOA-ANATL selebra akordu ba operasionál aeroportu Rota do Sândalo
Lembra katak, iha 18 Maiu 2024, Primeiru-Ministru, Kay Rala Xanana Gusmão, hamutuk ho Prezidente Autoridade RAEOA, Rogério Lobato, no na’in ba Aviaun Aero Dili, Lourenço de Oliveira, lansa ona vou dahuluk Dili-Oé-Cusse ho presu billete dolár $20 no Oé-Cusse ba Dili ho presu dolár $22, hodi hala’o operasaun kada semana dala-rua, iha loron segunda no sesta-feira.
Jornalista: Abílio Elo Nini
Editora: Maria Auxiliadora
