DILI, 08 agostu 2024 (TATOLI) – Ministru Juventude Desportu Arte no Kultura (MJDAK), Nelyo Isaac Sarmento hateten, Federation International Football Association (FIFA) bele kontinua halo konstrusaun ba Estádiu Munisipál Dili, maibé haree ba estrutura Federasaun Futeból Timor-Leste (FFTL) ne’ebé seidauk loos maka Governu foti desizaun ba konstrusaun estádiu ne’e.
“FIFA bele kontinua halo konstrusaun, maibé depende ba estrutura FFTL, maibé ita haree agora sira-nia estrutura seidauk la’o loos, ita husik nune’e de’it, entaun Governu foti desizaun atu konstroi de’it ona hahú tinan oin. Ita haree FFTL agora vacum hela, laiha estrutura ida-ne’ebé tuir baze kongresu nian, sira agora interinu de’it mak la’o, ita labele hein tan,” Ministru Nelyo hateten ba Agência TATOLI iha Palásiu Governu Dili, ohin.
Notísia relevante:Kongresu FFTL atu efetua fali depende FIFA
Nia dehan, Governu haree hela, bainhira estrutura FFTL seidauk liuhusi kongresu legál, Governu susar atu koopera no liuhusi Konfederasaun Desportiva Timor-Leste (CDTL-sigla portugés), Komite Olímpiku Nasionál Timor-Leste (CONTL-sigla portugés) atu haree hafoin Governu foti desizaun ruma.
“Estádiu Munisipál ita halo ona planu dezeñu, tinan ida-ne’e ita seidauk bele halo maibé ita tau ona orsamentu ba tinan oin. Maibé ba Estádiu Dili Governu finansia atu halo iha tinan oin, ita mós iha parseiru bilaterál balun hakarak ajuda ka fó apoiu konstroi ita-nia Estádiu ne’e. Ita labele hein beibeik ita tenke avansa ba oin,” nia tenik.
Harii Estádiu Olímpiku
Daudaun ne’e Governu mós haree hela rai-mamuk balun ne’ebé fora husi kapitál Dili atu halo estudu nune’e bele konstroi Estádiu Olímpiku ne’ebé boot liu Estádiu Munisipál Dili.
“Ita buka hela rai-mamuk balun fora husi Dili atu harii fali Estádiu Olímpiku ida-ne’ebé boot liu Estádiu Dili, tanba ita atu transforma Estádiu Dili ba los de’it kampo futeból los de’it, la kahur tan ho atividade desportu seluk. Ita agora iha ona prosesu nia laran fiar katak tinan oin ita realiza,” Nelyo hakotu.
Notísia relevante:Amante Futeból: kanselamentu kongresu FFTL fó impaktu ba dezenvolvimentu futeból iha TL
Jornalista: Hortencio Sanchez
Editór: Rafael Ximenes de A. Belo
