BOBONARO, 09 agostu 2024 (TATOLI) – Prezidente Autoridade Munisípiu Bobonaro, Alexandrino Pires, daudaun ne’e halo hela esforsu hodi buka empregu ba joven-sira iha suku 50, postu administrativu neen ne’ebé durante ne’e sei dezempregu hela.
Nia hato’o asuntu ne’e durante halo diálogu komunidade sira iha suku Daudu, Genulai no Meligo, postu administrativu Cailaco, kinta ne’e.
Notísia relevante: PAM Bobonaro husu joven sira partisipa ativu iha prosesu dezenvolvimentu
“Ha’u esforsu ba Bobonaro, ba joven-sira ha’u preokupa tebes tenke ser iha serbisu, ema seluk bele servisu nusá mak Bobonaro atu sai atan de’it, entaun ha’u tenke ser buka dalan atu lori rezolve ami-nia problema,” nia hateten iha suku Daudu.
Nia dehan, esforsu ne’e iha ona sinál pozitivu tanba iha loron-kuarta (07/08/2024) hasoru malu no halo enkontru ona ho delegasaun ida hosi Korea Súl iha Dili.
Nia reforsa iha tempu badak sei asina akordu kooperasaun ho governu Korea Súl atu haruka timoroan ba serbisu iha nasaun ne’e.
“Agora prosesu la’o hela, horikalan ha’u sei kontaktu malu hela ho sira, dehan hein semana rua tán ekipa ida mai. Ami kuandu asina tiha akordu komesa ona rejistu, depois kursu fulan ida, hotu prepara imi-nia fíziku aranka ona ba, ne’e la hanesan ho SEFOPE nian ida,” nia katak.
Nia dehan, programa ne’e sei fó oportunidade ba joven feto no mane atu ba serbisu iha área tolu hanesan; fábrika, peska no agrikultura.
Nia salienta, rekrutamentu ne’e loke ba munisípiu hotu maibé prosesu hotu sei responsabiliza masimu husi Autoridade Munisípiu Bobonaro.
Kona-ba prosesu rejistrasaun.
Nia subliña, sei liu husi xefe suku idak-idak, hafoin administradór postu sira aprezenta ba autoridade munisipál Bobonaro atubele partisipa kursu lian Korea durante fulan-ida.
PAM argumenta, kuota ne’ebe governu Koreia Súl husu ba munisípiu Bobonaro de’it presiza ema hamutuk rihun 17.
“Hotu-hotu tenke ser hetan oportunidade, atu nune’e ba servisu iha ne’ebá haruka osan mai hadi’a uma, ajuda alin sira bele eskola, lori hadi’ak mós ita-nia ekonomia uma laran,” nia katak.
Nia parte halo esforsu ne’e tanba durante tinan barak nia laran Bobonaro oan lubuk ida tuir teste iha Sekretaria Estadu Formasaun Profesionál no Empregu (SEFOPE) atu ba Koreia, maibé barak mak la pasa.
“Ha’u-nia joven-sira prepara imi nia-aan didi’ak ba, labele hemu tua, no labele ransu arbiru,” nia fó hanoin.
Notísia relevante: MS-PAM Bobonaro formaliza kompromisiu hapara TB iha 2025
Jornalista: Sérgio da Cruz
Editór: Evaristo Soares Martins
