DILI, 09 agostu 2024 (TATOLI)—Bee Timor-Leste, Empreza Públika (BTL, E.P) daudaun kontinua halo esforsu hodi estabelese bee ba fatin konsentrasaun ba sarani sira husi munisípiu ne’ebé sei konsentra iha pontu entrada ba munisípiu Dili nia hanesan, Tibar, Hera no Kasnafar-Beduku.
Vise-Prezidente Komisaun Ezekutiva BTL, E.P, ba Asuntu Sistema Bee, Saneamentu no Drenajen, Gustavo da Cruz, hateten, BTL, E.P nia preparasaun oferese bee ba sarani sira husi parókia tolu ne’ebé atu partisipa misa iha Tasi-tolu ne’ebé tuir desizaun Governu nian konsentra iha Hera, Tibar no Kasnafar BTL, E.P daudaun halo ona esforsu másimu hodi fornese bee iha fatin tolu ne’e.
“Ita hotu hatene pontu entrada ba Dili ne’e, fatin tolu, mak Hera, Tibar no Casnafar BTL, E.P buka atu estabelese fontes bee iha fatin tolu ne’e, parte Hera nian BTL, E.P instala hotu ona iha kampaun IGEADE, I.P nian ne’ebé ami halo serbisu hotu ona daudaun ha’u-nia ekipa iha ona Tibar haree fatin monta tanke iha Tibar nian no semana oin kontinua ba Casnafar nian,” Gustavo da Cruz, hateten, iha Hudi-laran, sesta ne’e.
Ezekutivu ne’e dehan, fonte ne’ebé BTL, E.P prepara ba fatin tolu inklui Tasi-tolu ne’e, halo uluk tanke rezelvatóriu liga bee ne’e ba uluk tanke rezervatóriu mak foin fahe ba unidade tanke sira seluk.
Ba Tasi-tolu nian finaliza tiha ona bee mós iha postu polísia nian ne’e hein de’it kompañia kaer obra halo instalasaun bai ha altar no área misa nian ne’e hotu hein halo konesaun mai tanke rezervatóriu hodi bee ba tanke unidade sira bele la’o.
“Tuir informasaun sentina públiku ne’ebé sei monta iha Tasi-tolu ne’e hamutuk 70 no tanke bee ne’ebé iha tempu liubá parseiru Partisipa entrega ona ba komisaun organizadora hamutuk 60 ne’e, 30 tau iha Tasi-tolu restu ba monta iha sentru konsentrasaun sarani sira nian Tibar, Hera no Kasnafár.
Notísia relevante:Deputadu Kalohan husu BTL, E.P tau atensaun ba komunidade halerik ba bee-moos
Jornalista : Arminda Fonseca
Editór: Rafael Ximenes de A. Belo
