OÉ-CUSSE, 12 Agostu 2024 (TATOLI) – Sekretáriu Rejionál ba Asuntu Saúde, Autoridade Rejiaun Administrativa Espesiál Oé-Cusse Ambeno (RAEOA), hamutuk ho Asosiasaun Leno Oé-Cusse (A-LAO), halo lansamentu ba fornesimentu ai-han nutritiva ba inan isin-rua, inan fó-susu no labarik menus husi tinan lima, ne’ebé nia alvu destina ba suku Naimeko, sub-rejiaun Pante Makasar, no suku Bobometo, sub-rejiaun Oésilo.
Sekretáriu Rejionál ba Asuntu Saúde, Luís de Jesus Neno, hateten problema má-trisaun iha Oé-Cusse okupa fatin datoluk iha Timor-Leste ho 57% ka afeta labarik 700-resin iha suku lima – Lifau, Costa, Naimeko, Bobometo no Usitasa’e.
Tanba ne’e, ai-han lokál hanesan manu-tolun, ai-farina, fehuk, talas no seluk tan importante ba labarik no inan isin-rua sira atu konsumu hodi hasa’e nutrisaun.
Notísia relevante: Sekretáriu Rejionál Saúde Oé-Cusse otimista rezolve kazu má-nutrisaun
“Kazu má nutrisaun iha Oé-Cusse tama iha terseira klasifikasaun iha Timor-Leste, tan ne’e, ohin, ita lansa fornesimetnu ai-han ba labarik sira no inan isin-rua no sei fó susu ba labarik. Ita husu povu tomak atu serbisu hamutuk ho ekipa no ajénsia nasionál no internasionál, nune’e bele rezolve má nutrisaun tuir matadalan ne’ebé iha”, Luís Neno dehan iha suku Naimeko, ohin.
Autoridade ne’e salienta katak aleinde suku lima, iha suku sira seluk mós rejista, maibé dadús la to’o ema 100. “Suku lima ne’e mak rejista 100-resin, tanba ne’e mak Governu la taka matan atu serbisu hamutuk ho pesoál saúde, ONG lokál sira atu hamutuk rezolve kazu ne’e”, katak.
Notísia relevante: Assanami lansa programa nutrisaun integrada iha Oé-Cusse
Iha fatin hanesan, Diretór-Ezekutivu A-LAO, Firmindo Joanico Caunan, fó sai katak programa ne’e hetan apoiu husi Unidade Misaun Kombate Stunting (UNMICS) no dadus benefisiáriu ba programa ne’e hamutuk 156, husi sentru saúde Baqui 102 no Oésilo 54.
“Ita halibur dadus husi sentru saúde no lidér lokál sira. Maneira atu simu hahán nutritiva sei konsentra iha fatin ida. A-LAO prepara feto tolu mak te’in no fornese hahán, hahú segunda to’o sesta, tuir menú ne’ebé Ministériu Saúde entrega ona mai ami atu fó hahán nutritiva ba labarik no inan sira”, katak.
Nia salienta katak bainhira benefisiáriu sira-ne’ebé la marka prezensa iha sentru fornesimentu, A-LAO ho ekipa sei esforsa hakbesik sira, nune’e bele rezolve problema subnutrisaun iha Oé-Cusse.
Ba programa ne’e, xefe suku Naimeko, Marcos Liu, hateten polítika ne’e bele rezolve ona problema má-nutrisaun iha Oé-Cusse, liuliu iha Naimeko.
“Ha’u agradese ba Governu liuhusi UNMICS tanba tau-matan ba inan-feton sira no labarik sira atu kore-aan husi kazu má-nutrisaun, liuliu iha ha’u-nia suku”, nia hato’o.
Notísia relevante: UNMICS lansa programa nutrisaun integradu iha suku sia
Tuir Timor-Leste Food and Nutrition Survey (TLFNS) iha 2020, nasaun enfrenta problema nanizmu infantíl 47% no RAEOA okupa fatin datoluk ho 57%, Ermera 63% no Ainaro 60%.
Bazeia ba livru 3C RAEOA-ZEESM nian iha 2021 kona-ba dadus Timor Leste Living Standard Survey iha 2014 hatudu katak índise liña ki’ak iha Oé-Cusse atinje 62,2%, signifika presiza fó atensaun maka’as ba planeamentu no dezenvolvimentu ekonómiku komunidade nian.
Jornalista: Abílio Elo Nini
Editóra: Maria Auxiliadora
