DILI, 12 agostu 2024 (TATOLI)—Sentru formasaun ba ema ho defisiénsia ne’ebé mak Ministériu Edukasaun (ME) estabelese iha munisípiu Lautém, Dili no Aileu daudaun ne’e menus ekipamentu.
“Ami peskiza durante fulan-tolu no ami bá hasoru ema ho defisiénsia no jestór sentru rekursu sira ne’e hodi haree kona-ba efetividade sentru, husi peskiza ne’e deskobre katak sentru ne’ebé estabelese iha munisípiu tolu ne’e iha dezafiu menus ekipamentu nesesáriu sira hodi hatán ba atividade ema ho defisiénsia no ema sira iha sentru ne’e mós koñesimentu menus,” Diretór Ezekutivu Asosiaun Defisiénsia Timor-Leste (ADTL), Cesário da Silva, hateten, iha Jardim 05 de Maio, segunda ne’e.
Aleinde ne’e, rekursu umanu atu fasilita ema ho defisiénsia asesu ba sentru ne’e mós limitadu no mákina braille iha munisípiu Lautém no Aileu avária hotu no la funsiona.
“Sentru ne’e estabelese ho intensaun atu prepara kondisaun ba ema ho defisénsia maibé realidade iha limitasaun barak,” nia akresenta.
Notísia relevante : INDMO atribui sertifikadu akreditasaun ba sentru formasaun profisionál
Diretór ne’e dehan, solusaun prinsipál liu mak Governu liuhusi Ministériu Edukasaun (ME) presiza seriedade atu kontinua hadi’a saida mak seidauk di’ak no limitasaun sira ne’ebé mak sentru iha.
“Koko buka solusaun ba problema ne’ebé sentru formasaun sira enfrenta no úniku solusaun mak iha Orsamentu Jerál Estadu 2025 ne’e aloka mós ba rekursu tanba rekursu ne’e importante tebes,” nia sujere.
Cesário da Silva haktuir, ME rasik kontente ho peskiza ida-ne’e no sira sei esforsu hodi solusiona problema ne’ebé kada sentru enfrenta, tanba ne’e hanesan baze ida ba ministériu atubele hadi’a planu asaun anuál.
Iha sorin seluk, Ministra Edukasaun, Dulce de Jesus Soares, hateten, edukasaun inkluzivu sai prioridade boot ida iha IX Governu Konstitusionál, tanba ne’e apresia tebes ba ADTL nia inisiativa uza sentru sira ho efetivu, nune’e husu ba parte hotu atu apoiu sentru ne’e hodi bele funsiona ho di’ak liután ba oin.
“Setór sira ne’e iha ligasaun ba malu tebes, tanba dezenvolvimentu labarik ida-nian depende tebes ba área sira ne’ebé mak ita-boot sira halo peskiza, tanba ne’e mak Ministériu Edukasaun apresia no prontu atu rona, tanba ne’e nafatin sai ami-nia parseiru iha prosesu ida-ne’e tanba Ministériu Edukasaun mesak labele. Husi ne’e ba oin husu atu reforsa malu liután serbisu liuhusi peskiza ida-ne’e bele ajuda Ministériu Edukasaun hodi serbisu di’ak liután bazeia ba evidénsia,” Ministra tenik.
Jornalista : Osória Marques
Editora : Julia Chatarina
