DILI, 11 jullu 2024 (TATOLI)—Institutu Nasionál Dezenvolvimentu Mão-de-Obra, Institutu Públiku (INDMO, I.P), kinta ne’e, atribui sertifikadu ba sentru formasaun profisionál sira ne’ebé hetan ona lisensiamentu operasionál, akreditasaun instituisionál, akreditasaun programa no atribuisaun sertifikadu ba formadór sira.
Sertifikadu fahe husi Vise Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay.
Diretora INDMO, I.P, Isabel Fernandes de Lima, hateten, atividade ohin realiza tanba INDIMO nia knaar ida mak define kompeténsia hanesan kualifikasaun nasionál tenke iha sertifikasaun.
“Ita halo atribuisaun sertifkadu ba fornesedór formasaun profisionál ne’ebé hetan lisensa operasionál, akreditasaun institusionál, akreditasaun programátiku no atribui mós kartaun profisionál ba formadór hamutuk 23 sira-ne’ebé durante ne’e hanorin iha sentru formasaun profisionál sira ho durasaun tempu naruk,” Diretora relata iha salaun Ministériu Finansa (MF), Aitarak-laran, kinta ne’e.
Notísia relevante : INDMO entrega sertifikadu ba fornesedór formasaun profisionál-avaliadór 73
Atividade ne’e bazeia ba dekretu-lei númeru 8/2008, loron 05 marsu, instituisaun públiku ida-ne’ebé responsável ba dezenvolvimentu polítika formasaun profisionál no ninia implementasaun, nune’e mós hodi define padraun kompeténsia no sistema sertifikasaun ida-ne’ebé hetan autonomia administrativa, finanseira no patrimóniu rasik.
Funsaun INDIMO, I.P rasik rejista sentru formasaun profisionál atu akredita kursu iha sentru formasaun profisionál hodi fasilita dezenvolvimentu no revizaun ba padraun kompeténsia atu aprova no rejistu iha estrutura kualifikasaun nasionál Timor-Leste hodi sertifika fornesedór formasaun profisionál no fasilita dezenvolvimentu ba rekursu aprendizajen.
Lista fornesedór formasaun profisionál ne’ebé hetan akreditasaun programátiku hamutuk neen mak hanesan Sentru Kapasitasaun Jestaun Finansa Públika, Sentru Nasionál Formasaun Profisionál SENAI Becora, Fundasaun CICANADA-STVJ, Sentru Formasaun Integrál Joven Kriansa Manatuto, (CFIJC, sigla portugés), Vizaun Foin-Sa’e – Dili, Canossian Vocational Training Centre (CVTC) – Suai Covalima.
Lista akreditasaun instituisionál hamutuk haat mak hanesan Asosiasaun Pro-Ema, Telekomunikasi Indonesia Internasionál Timor-Leste SA, Lorosa’e English Language Institute (LELI), no East Timor Development Agency (ETDA).
Lisensiamentu operasionál hamutuk 11 mak hanesan AHISAUN, Sentru Juventude Munisípiu Aileu, CANXIGO, Asosiasaun Nasionál Juventude Kristasaun Timor-Leste, Fundasaun Hadomi Timor, Ermera Ai-Kulat Mutin Orgánika, Fundasaun Asaun Juventude Rurál, Fundasaun Many Hands One Nationa, Sentru Formasaun Haburas Lian Korea Timor-Leste, Fundasaun Aquito Tanque de Guerra no Foinsa’e mak inspiradór ba arte no transformasaun.
Sentru formasaun prepara joven asesu merkadu traballu
Iha fatin hanesan, Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten, sentru formasaun iha territóriu ne’ebé mak prepara ninia joven sira asesu ba formasaun no liga ba merkadu traballu.
“INDIMO nu’udar instituisaun ida-ne’ebé regula sentru formasaun sira hotu iha territóriu, entaun sentru sira ne’ebé atu hetan akreditasaun, rejistradu, operasaun, komunitáriu tenke hetan avaliasaun másimu husi INDIMO hodi hetan sertifikadu,” nia dehan.
Nune’e, governante ne’e husu ba jestór sira-ne’ebé daudaun sira-nia sentru foin rejista, komunitáriu no seluk tan tenke halo esforsu másimu hodi hetan akreditasaun ka kualifikadu.
“Agradese mós ba formadór 23 ne’ebé ohin hetan apresiasaun husi INDMO, ida-ne’e hatudu katak ita-boot sira hatudu duni prestasaun serbisu di’ak hodi fasilita formasaun di’ak ba ita-nia joven sira,” nia tenik.
Iha fatin hanesan, Madre Canosiana, Maria Filomena Freitas husi CFIJC, kontente tebes tanba sira-nia parte ohin loron bele hetan ona akreditasaun ba programátiku.
“Ami sente kontente tebes, nune’e ba oin ami halo esforsu nafatin ba fiar ne’ebé INDMO fó mai ona,” nia apresia.
Atividade ne’ebé sira hala’o mak hanesan fó formasaun área ospitalidade, otelaria, suku hena ho mákina, lian inglés, portugés no seluk tan.
Jornalista : Arminda Fonseca
Editora : Julia Chatarina
