BOBONARO, 13 agostu 2024 (TATOLI)-Komisaun Nasionál Eleisaun (CNE, sigla portugués) no Sekretariadu Tékniku Administrasaun Eleitorál (STAE), tersa ne’e realiza atividade edukasaun sívika hodi introdús lala’ok eleisaun munisipál no lei podér lokál ba líder komunitária ho komunidade sira iha postu administrativu Cailaco, munisípiu Bobonaro.
Diretór CNE Munisípiu Bobonaro, Juvito Ramos, esplika atividade ne’e realiza hanesan faze preparasaun oinsá atu hasoru eleisaun kámara munisipál ne’ebé sei akontese iha tinan 2025.
Notísia relevante: CNE Bobonaro identifika erru barak mosu iha eleisaun suku
“Ami mai halo uluk sensibilizasaun kona-ba lei ne’e, nune’e ita-boot sira bele iha koñesimentu antes, molok atu partisipa. Bainhira ita realiza eleisaun ne’e ita-boot sira komprende ona lala’ok husi eleisaun ne’e,” nia hateten iha sede suku Atudara.
Diretór STAE Munisípiu Bobonaro, Mariano Viegas Amarál, reforsa STAE akompaña CNE hodi halo sosializasaun konbá lei númeru 22/2021 kona-bá lei eleitorál munisipál no lei 23/2021 kona-bá lei podér lokál no desentralizasaun administrativa.
Alende ne’e sosializa mós lei númeru 19/2021 kona-bá resensiamentu eleitorál atualizasaun bazededadus no biométriku.
“Sistema ne’e iha nivél nasionál implementa tiha ona, iha nível munisípiu agora iha ona faze sosializasaun, ita hein orientasaun 2025 ita implentasaun iha munisípiu no postu administrativu,” nia esplika.
Administradór postu administrativu Cailaco, Rodolfo da Cruz, konsidera atividade ne’e importante tebes.
Tanba ne’e nia rekomenda ba órgaun administrasaun eleitorál atu hatutan realiza atividade edukasaun sívika ba komunidade iha suku seluk ne’ebé seidauk partisipa.
“Ita nia komunidade iha suku ho aldeia kuaze seidauk hatene lei ida-ne’e, entaun edukasaun sívika ne’e presiza halo tán iha suku seluk, atu nune’e bele transmite hela ba ita-nia komunidade hatene lei foun ne’e ho ninia sistema no lala’ok sira,” nia katak.
Notísia relevante: STAE Bobonaro lansa REABD iha aldeia Bour prepara ba eleisaun suku
Jornalista: Sérgio da Cruz
Editór: Evaristo Soares Martins
