BOBONARO, 30 outubru 2023 (TATOLI)-Diretór CNE, munisípiu Bobonaro, Juvito Ramos, informa hosi rezultadu supervizaun hosi CNE durante eleisaun suku iha loron 28 fulan-outubru 2023 mosu erru no lamentasaun barak hosi eleitór sira kona-ba atendimentu no lala’ok eleisaun suku.
“Ami nia supervizaun identifika mosu failansu tékniku balun kona-ba lala’ok eleisaun ida ne’e no mós mosu lamentasaun hosi eleitór barak, primeiru kona-ba bulletin votu ba ita-nia kandidatu xefe aldeia no delegadu ho delegada laiha fotografia no mós sira lamenta tanba atendimentu meza eleitorál distribui bulletin ne’e tarde. Ida ne’e mak mosu dezentendimentu barak iha kada sentru votasaun tanba eleitór ho númeru ne’ebé bo’ot,” nia relata ba jornalista sira iha kna’ar fatin segunda ne’e.
Notísia Relevante:CNE Covalima husu aumenta pesoál rejista lista eleitór iha segunda ronda
Durante prosesu eleisaun ne’e la’o, CNE nota sidadaun sira partisipa maka’as iha eleisaun ne’e tanba nota hahú tuku 09:00 dadeer OTL, eleitór barak forma ona iha lina laran atu ezerse sira-nia votu maibé uza sistema manuál hodi halo sidadaun sira forma oras barak, entaun barak mak fila no la konsege vota.
“Ita-nia kondisaun agora rai-manas, hamlaha entaun ema barak fila tiha tanba ne’e mak ema barak mak la ezerse sira-nia direitu. Tanba hanesan ohin ne’e meza distribui tarde tanba sira tenke hakerek kandidatu ba xefe aldeia, delegadu ho delegada entaun ida ne’e mak ema hein kle’ur fila tiha bá uma, ho ida ne’e mak taxa partisipasaun ne’e ladun di’ak,”nia hateten.
Hatan ba asuntu ne’e, Diretór Sekretáriadu Tékniku Administrasaun Eleitorál (STAE) munisípiu Bobonaro, Mariano Viegas Amarál klarifika katak STAE halo atendimentu bazeia ba lei no regras no mós orientasaun ne’ebé maka iha.
“Ita labele servisu tuir ita-nia hakarak lei haruka dehan hanesan ita halo hanesan ne’e, agora sistema manuál ne’ebé maka iha eleisaun ne’e, eleisaun komunitária nia katak ema ida tenke vota iha aldeia entaun ita prepara lista votantes mamuk,”Nia esklarese
Nia dehan, problema hirak ne’e mosu tanba aldeia balun ho númeru eleitór barak atu hanesan ho suku ida nian, entaun afeta ba prosesu atendimentu ne’ebe la’o kle’ur.
“Barak mak akontese hanesan ne’e maibé la’ós hotu-hotu iha maioria aldeia mak preokupasaun sira hanesan ne’e ladun iha, maibé so aldeia sira ne’ebé maka eleitór barak,ida ne’e maka iha preokupasaun, nia hateten.
Tuir rezultadu apuramentu hosi totál suku 50 iha munisípiu Bobonaro, suku 23 ninia kandidatu eleitu kedas iha eleisaun primeira ronda, maibé suku 27 tenki hakat ba segunda volta ne’ebe sei hala’o iha loron 13 fulan-novembru 2023 tanba laiha kandidatu ida mak manán maioria, enkuantu ba xefe aldeia no delegadu ho delegada sira, daudaun ne’e STAE sei halo hela prosesu rekapitulasaun.
Notísia Relevante:CNE sei investiga kazu rejeita aprezentasaun kandidatu xefe aldeia Builecun Balibo
Jornalista: Sergio da Cruz
Editór:Agapito dos Santos
