Konsulta Populár ba da-25: Governu presiza halo reflesaun ba problema sosiál
DILI, 13 agostu 2024 (TATOLI)–Prezidente Konsellu Nasionál Juventude Timor-Leste (CNJ-TL), Maria Dadi Soares Magno, hateten Governu presiza halo reflesaun ba iha problema sosiál ne’ebé sosiedade hasoru, iha ámbitu atu komemora loron kosulta populár ba da-25 (30 agostu 1999-30 agostu 2024) iha 30 agastu 2024 ne’e.
Notísia Relevante: PN sei realiza sesaun solene komemora loron konsulta populár ba da-25
“Problema ne’ebé mosu iha sosiedade no foinsa’e sira hasoru mak hanesan taxa dezempregu ba foinsa’e sira produtivu iha rai-laran, foinsa’e barak prefere servisu iha rai-li’ur. Sentidu nasionalizmu mihis, barak lakohi eskola, númeru moras HIV/SIDA aas, violasaun krime mosu oioin hanesan so’e bebé no má nutrisaun iha Timor-Leste,” Prezidente Konsellu Nasionál Juventude Timor-Leste, Maria Dadi Soares Magno, ba Tatoli, iha nia eskritóriu iha Faról, segunda (12 agostu 2024) ne’e.
Nia hatutan, iha mós problema sira hanesan iha setór saúde hanesan falta ai-moruk no bee no saneamentu ne’ebé povu barak sei ba kuru bee loro-loron.
“Ha’u hanesan feto no inan, lamentavel loos. Ha’u la’ós dehan julga, maibé tenke iha esforsu. Ita tenke ko’alia bu’at ne’ebé loos no reál. La temi hotu-hotu, maibé ida-ne’e Estadu demokrátika,” nia dehan.
Nia hateten, sira-ne’e hotu mak sai hanesan pontu refelesaun ida-ne’ebé to’o agora ladún iha progresu, tanba ne’e husu Governu la’os tempu ba povu atu selebra de’ it serimónia de’it no dada bandeira kanta inu nasionál, ne’e sentidu ida laiha valór, bainhira halo ezame konsiensia iha prosesu agora, povu kontinua halerik iha prosesu dezenvolvimentu agora.
Estadu tenke fó espasu ba povu atu povu mós sente dezenvolvimentu nasionál, tan ne’e Primeiru-Ministru, Kay Rala Xanan Gusmão bele uza iha tinan ida-ne’e pensamentu kritiku hanesan gerilleiru, rezisténsia no veteranu no vizionariu polítiku no hatene prosesu tomak.
“Governu iha polítika no tenke sensibiliza polítika no seidauk implementa polítika ho seiriedade. Paun loro-loron mak seidauk to’o ba ema hotu. Governu tenke iha seriedade ba implementasaun polítika. Ukun ho unidade no responsabilidade. Governu tenke haree ba iha asuntu sosiál, saúde no edukasaun no hare estratéjia polítika di’ak no aselera polítika desentralizasaun,” nia hateten.
Loron 30 agustu, hanesan loron ne’ebé Timor-Leste komemora festa povu nian kona-ba konsulta populár no referendu.
“Ita-nia mensajen mak halo reflesaun ba loron 25 konsulta populár, tanba marka istória importante iha prosesu rezisténsia ba Timor nia liberdade independente. Progresu la’o uitoan de’it,” nia dehan.
Tanba ne’e, nia husu ba foinsa’e sira hodi hadomi Timor ne’e tenke rezilente hasoru funu foun ba realidade moris.
“Kuda nafatin sentidu patriotizmu, buka oportunidade iha ne’ebé de’it iha sentru ka konsellu juventude hodi aprende no buka voluntarizmu. Parte ida aprende no kontribui ba dezenvolvimentu,” nia dehan.
Notísia Relevante: Komemorasaun konsulta populár konsolida juventude nia espíritu nasionalizmu-patriotizmu hateke ba oin
Jornalista : Jesuína Xavier
Editór : Cancio Ximenes
