DILI, 13 Agostu 2024 (TATOLI) – Ministériu Agrikultura, Pekuária, Peska no Floresta (MAPPF), liuhusi Diresaun Nasionál Pekuária no Veterinária dezenvolve rai ektare 27 iha sentru haki’ak animál lima hodi kuda ai-han balada nian, nune’e bele hasa’e rezisténsia ba karau, bibi no kuda ne’ebé haki’ak iha sentru.
Diretór-Jerál Pekuária no Veterinária, Carlos António Amaral, hateten Ministériu Agrikultura prioriza dezenvolvimentu ai-han ba animál sira ne’ebé han duut no ai-tahan, nune’e bele ajuda hasa’e produsaun karau, bibi, no kuda ne’ebé daudaun ne’e haki’ak hela iha sentru sira.
Hahán ba animál ne’ebé kuda uluk ona ona iha rai ektare 15 iha sentru Pato-Lautém no sentru Dotik-Manufahi no restante ekatare sei kuda sentru tolu seluk iha Raitahu-Viqueque, Natarbora-Manatuto no Korluli-Maliana, ne’ebé nian prosesu foin tama iha konkursu públiku.
“Ita identifika ona iha rai ektare 27 ne’e iha sentru rua ho rai ektare 15 maka ita dezenvolve ona hahán ba animal sira maka iha sentru Pato kuaze ektare 10 no Dotik ektare 5. Maibé, ba sentru Raitahu ho ektare 3, Korluli ektare 5 no Natarbora ektare 5. Ita seidauk dezenvolve tanba sira ninia prosesu foin mak tama iha konkursu públiku”, Carlos Amaral adianta iha Comoro, ohin.
Plantasaun ai-han animál iha sentru Pato no Dotik nia orsamentu mai husi tinan ida ne’e ho montante rihun $50. Ai-han ne’ebé diresaun kuda ona iha sentru rua ne’e maka du’ut-tarampa, tohu fuik, ai-turi no ai-gamal.
Diresaun mós planeia atu kuda ai-han sira seluk hodi fó han ba karau bibi no kuda sira atu aumenta sira-nia rezisténsia maka hanesan utilizasaun reziduu agríkola, katak dezenvolvimentu ai-han ba animál sira ne’e mai husi ai-horis sira maka hanesan hare, batar, fore-keli no fore-rai.
“Ai-han sira ne’e kuandu agrikultór sira foti ona nia isin, diresaun sei utiliza de’it batar-kain, hare-kulit hodi konserva, kahur fali ho masin atu hetan nia rezisténsia, nune’e bainhira fó han ba karau, kuda no bibi bele iha sabór”, esplika.
Ba sentru tolu seluk ne’ebé nia prosesu tama ona iha konkursu públiku ne’e, diresaun prevee ona osan ba kada sentru rihun $10 no, tuir planu, iha Outubru tinan ne’e, atu dezenvolve ona sentru tolu ne’e.
Iha sorin seluk, Diretór Servisu Agrikultura Manufahi, Eltino Araújo, informa katak ai-han ne’ebé Ministériu Agrikultura kuda ona iha rai ektare 10 iha sentru Dotik ne’e kuaze moris ho di’ak, tanba kuda iha área sentru nian ne’ebé hetan kontrolu másimu, nune’e sei fó han ba animál sira ne’ebé haki’ak iha sentru ne’e.
Jornalista: Tomé Amado
Editora: Maria Auxiliadora
